کپاس بحران سنگین، کسان استحصال کا شکار، پارک میں بدانتظامی پر سینیٹ کمیٹی میں تشویش
ندیم تنولی
اسلام آباد: پاکستان میں کپاس کا شعبہ شدید بحران کا شکار ہو گیا ہے جبکہ روایتی کپاس بیلٹس سکڑنے اور مقامی کاشتکاروں کے استحصال کے انکشافات نے صورتحال کو مزید سنگین بنا دیا ہے۔ سینیٹ کی قائمہ کمیٹی برائے قومی غذائی تحفظ و تحقیق کے اجلاس میں بتایا گیا کہ ناقص پالیسیوں، بڑھتی پیداواری لاگت اور گنے کی کاشت میں اضافے کے باعث پاکستان، جو کبھی کپاس برآمد کرنے والے بڑے ممالک میں شمار ہوتا تھا، اب درآمدات پر انحصار کرنے پر مجبور ہو چکا ہے۔
اجلاس کے دوران سینیٹر عابد شیر علی نے الزام عائد کیا کہ بااثر مافیا کسانوں کے مفادات کو نقصان پہنچا کر فائدہ اٹھا رہا ہے۔ انہوں نے کہا کہ درآمدی کپاس پر زیرو ٹیکس ہے جبکہ مقامی کاشتکار مختلف ٹیکسوں اور مالی دباؤ کا سامنا کر رہے ہیں۔ انہوں نے وفاقی اور صوبائی حکومتوں کے درمیان مؤثر رابطہ کاری کا نظام قائم کرنے پر زور دیتے ہوئے کہا کہ کپاس کی بحالی اور کسانوں کے تحفظ کے لیے فوری اقدامات ناگزیر ہیں۔
وفاقی وزیر رانا تنویر حسین نے بحران کا اعتراف کرتے ہوئے کہا کہ کم پیداوار کی وجوہات میں زوننگ قوانین پر کمزور عملدرآمد، گنے کی بڑھتی کاشت اور موسمیاتی تبدیلیوں کے اثرات شامل ہیں۔ انہوں نے دعویٰ کیا کہ ملک میں کھاد کی کوئی قلت نہیں اور اس کی قیمتیں عالمی مارکیٹ کے مقابلے میں مناسب سطح پر ہیں۔
اجلاس کو بتایا گیا کہ پاکستان ایگریکلچرل ریسرچ کونسل (PARC) میں تحقیقی نظام، بیج ٹیکنالوجی اور زرعی مشینری کے شعبوں میں اصلاحات کی جا رہی ہیں، تاہم کمیٹی ارکان نے گندم اور کپاس کی کم پیداوار، صوبائی تعاون کے فقدان اور ترقیاتی منصوبوں میں تاخیر پر تشویش کا اظہار کیا۔ ارکان نے نشاندہی کی کہ خضدار اور تربت میں زرعی لیبارٹریز کے لیے مختص اربوں روپے تاحال استعمال نہیں کیے جا سکے۔
سینیٹر شہادت اعوان نے اجلاس کے دوران کسانوں کی حقیقی آمدن اور پیداواری لاگت و منافع کے درمیان بڑے فرق پر سوال اٹھاتے ہوئے کہا کہ کم پیداوار پاکستان کی زرعی صلاحیت کو متاثر کر رہی ہے۔ اس پر وفاقی وزیر نے یقین دہانی کرائی کہ PARC کو جدید تحقیقی مرکز میں تبدیل کیا جا رہا ہے جہاں معیاری بیجوں کی تیاری، ٹیکنالوجی کی منتقلی اور کسانوں کے لیے سہولیات پر توجہ دی جا رہی ہے۔
کمیٹی نے 2016 اور 2021 کے سیڈ رولز میں مجوزہ ترامیم کا بھی جائزہ لیا، جن میں لائسنسنگ، ریگولیٹری نظام اور نئے بیج کاروبار کے لیے قانونی وضاحت شامل ہے۔ پاکستان کاٹن جنرز ایسوسی ایشن کی درخواست پر کپاس پیدا کرنے والے علاقوں میں شوگر ملز کے قیام کی تجاویز بھی زیر غور آئیں۔
قائمہ کمیٹی کے چیئرمین سینیٹر سید مسرور احسن نے کہا کہ زرعی توسیعی خدمات اور وفاق و صوبوں کے درمیان مؤثر ہم آہنگی کے بغیر گندم اور کپاس سمیت اہم فصلوں کی کم ہوتی پیداوار کو روکنا ممکن نہیں۔
اجلاس کے اختتام پر مقامی کپاس کے لیے منصفانہ قیمتوں، سخت نگرانی اور تحقیقی اداروں کی تیز رفتار جدیدکاری پر زور دیا گیا تاکہ پاکستان عالمی کپاس مارکیٹ میں اپنی کھوئی ہوئی حیثیت دوبارہ حاصل کر سکے۔
Copied from: Acting Now on Pakistan Cotton Crisis – Peak Point
