اسلام آباد، 24 جولائی 2026: اسپیکر قومی اسمبلی سردار ایاز صادق نے وزارت خزانہ کی ڈپٹی سیکریٹری محترمہ عائشہ جاوید کو روٹلیج کی بین الاقوامی سطح پر معروف اشاعت Women in Public Finance: Stories of Gender in Budgeting میں بطور معاون مصنف شامل کیے جانے پر دلی مبارکباد پیش کی ہے۔
اسپیکر نے محترمہ عائشہ جاوید کی اس نمایاں کامیابی کو پاکستان کے لیے باعث فخر قرار دیا۔ انہوں نے کہا کہ ان کا باب “Limitless Skies and Endless Dreams” نہ صرف ان کی پیشہ ورانہ مہارت کی عکاسی کرتا ہے بلکہ پبلک فنانس، پالیسی سازی اور صنفی حساس بجٹ سازی میں پاکستانی خواتین کے بڑھتے ہوئے کردار کو بھی اجاگر کرتا ہے۔
سردار ایاز صادق نے کہا کہ پاکستانی خواتین کی بین الاقوامی فورمز پر کامیابیاں ملک کا مثبت تشخص اجاگر کرتی ہیں اور پاکستان کے سرکاری افسران کی غیر معمولی صلاحیت، محنت اور فکری استعداد کا ثبوت ہیں۔ انہوں نے زور دیا کہ اس نوعیت کی کامیابیاں نوجوان نسل، خصوصاً خواتین، کو اعلیٰ کارکردگی کے حصول اور قومی ترقی میں بامعنی کردار ادا کرنے کی ترغیب دیتی ہیں۔
اسپیکر قومی اسمبلی نے سرکاری اداروں میں خواتین کی شمولیت اور قیادت کو فروغ دینے والے اقدامات کی حمایت کا اعادہ کیا۔ ان کا کہنا تھا کہ پائیدار ترقی اور مؤثر حکمرانی کے لیے شمولیتی اور میرٹ پر مبنی ماحول ناگزیر ہے۔
