ایگزیکٹو ڈائریکٹر کی ہدایت پر کیپٹل ہسپتال میں یوم ذیابطیس کے موقع پر سیمینار منعقد ہوا جس کی قیادت شعبہ ذیابطیس کے سربراہ ڈاکٹر سرور ملک نے کی۔ اس موقع پر چیئرمین سی ڈی اے محمد علی رندھاوا بطور مہمان خصوصی موجود تھے اور انہوں نے بہترین کارکردگی دکھانے والے ڈاکٹروں کو شیلڈز تقسیم کیے۔ چیئرمین نے اپنے خطاب میں کہا کہ مستقبل میں شعبہ ذیابطیس کی توسیع کے لیے ضروری اقدامات کیے جائیں گے تاکہ مریضوں کو بہتر سہولیات فراہم کی جا سکیں۔تقریب کے دوران کیپٹل ہسپتال میں جلد کے سرجیکل یونٹ اور شعبہ نیورولوجی کے طبی یونٹس کا بھی افتتاح عمل میں آیا۔ ایگزیکٹو ڈائریکٹر پروفیسر نعیم تاج نے چیئرمین کو ہسپتال کی پیش رفت اور نئے یونٹس کے حوالے سے بریفنگ دی۔ انتظامیہ کا کہنا تھا کہ اسلام آباد کے سرکاری ہسپتالوں میں یہ جلد کا سرجیکل ٹریٹمنٹ یونٹ اپنی نوعیت کا پہلا مرکز ہے۔تقریب میں مختلف شعبوں کے ماہرین نے شرکت کی جن میں ڈائریکٹر ایڈمن ڈاکٹر سرتاج علی، ہیڈ آف میڈیسن ڈاکٹر فرحان علی، گائناکالوجسٹ ڈاکٹر شیبا، نیورو فزیشن ڈاکٹر ولید اقبال، کارڈیالوجسٹ ڈاکٹر عابد سعید اور ماہر ذیابطیس ڈاکٹر حنا شامل تھے۔ نرسنگ سپرنٹنڈنٹ میڈم سمینہ الیاس راجہ اور تمام ڈاکٹروں، نرسوں و سول سوسائٹی نے بھی بھرپور شرکت کی۔اس موقع پر ڈاکٹر سرور ملک نے ذیابطیس سے بچاؤ اور نگہداشت کے حوالے سے مفصل پیشکش پیش کی جس میں بیماری کی روک تھام، وقت پر تشخیص اور مریضوں کی تربیت پر زور دیا گیا۔ چیئرمین سی ڈی اے اور ایگزیکٹو ڈائریکٹر نے ڈاکٹر سرور ملک اور ان کی ٹیم کی محنت کو سراہا اور کہا کہ کیپٹل ہسپتال ذیابطیس کے حوالے سے اسلام آباد میں نمایاں مقام حاصل کرنے کی راہ پر گامزن ہے۔ فوکل پرسن شبیر تنولی نے پروگرام کے انتظامات کی نگرانی کی۔
کیپٹل ہسپتال میں یوم ذیابطیس پر سیمینار
کوئی تبصرہ نہیں ہے۔
