تقریبِ افتتاح اسلام آباد انٹرنیشنل ائیرپورٹ میں منعقد ہوئی جہاں وفاقی وزیر دفاع خواجہ محمد آصف نے نئی فضائی سروس کا باقاعدہ آغاز کیا۔ اس موقع پر برطانوی ہائی کمشنر جین میریٹ، سیکرٹری دفاع جنرل ریٹائرڈ محمد علی، ڈائریکٹر جنرل سول ایوی ایشن اتھارٹی نادر شفیع ڈار اور دفاعی و ہوابازی شعبے کے سینئر حکام بھی موجود تھے۔وزیر نے اپنے خطاب میں کہا کہ یہ اقدام حکومت کی ان کوششوں کا حصہ ہے جن کا مقصد قومی اداروں کی بحالی، عوامی خدمات میں بہتری اور بین الاقوامی شبیہ کو بہتر بنانا ہے۔ انہوں نے واضح کیا کہ اسلام آباد اور مانچسٹر کے مابین یہ براہِ راست پرواز پاکستانی ڈائیاسپورا کے لیے سہولت کا سبب بنے گی اور سفارتی و سماجی روابط کو مضبوط کرے گی۔تقریب میں حصہ لینے والے حکام نے بتایا کہ اس پیش رفت میں سول ایوی ایشن اتھارٹی، ایوی ایشن ڈویژن اور ایئر لائن انتظامیہ کی محنت اور پیشہ ورانہ کوآرڈینیشن کا اہم کردار رہا ہے۔ وزیر نے نادر شفیع ڈار اور پی آئی اے انتظامیہ کی کوششوں کو سراہا اور کہا کہ یہ کامیابی موثر پالیسی مینجمنٹ اور ادارہ جاتی ہم آہنگی کا نتیجہ ہے۔حکومت نے توقع ظاہر کی کہ اسلام آباد تا مانچسٹر براہِ راست پرواز نہ صرف مسافروں کے لیے آسانیاں پیدا کرے گی بلکہ تجارتی، سیاحتی اور ثقافتی تبادلوں کو بھی فروغ دے گی۔ اس سروس کے آغاز کو ملک کی ہوابازی صنعت میں ایک اہم سنگِ میل قرار دیا جا رہا ہے جو مستقبل میں مزید بین الاقوامی رابطوں کی راہیں کھولے گا۔
پی آئی اے کی اسلام آباد سے مانچسٹر براہِ راست سروس
کوئی تبصرہ نہیں ہے۔
