نیشنل کرکلم کونسل کی ڈائریکٹر ڈاکٹر تبسم ناز نے سیول، جنوبی کوریا میں عالمی شہریت کی تعلیم سے متعلق دسویں ورکشاپ میں پاکستان کی نمائندگی کی۔ اس موقع پر انہوں نے بتایا کہ پاکستان کے نصاب میں کس طرح عالمی شہریت کی تعلیم کے موضوعات شامل کیے گئے ہیں۔
ڈاکٹر تبسم ناز نے ورکشاپ میں پاکستان کے تعلیمی اصلاحات اور نصاب میں امن، تنوع، پائیداری اور عالمی ذمہ داری جیسے اہم پہلوؤں کو اجاگر کیا۔ انہوں نے کہا کہ ان موضوعات کی شمولیت سے پاکستانی طلبہ کو ذمہ دار عالمی شہری بننے میں مدد مل رہی ہے۔ اس عمل کے تحت تعلیمی نصاب کو اس انداز میں ترتیب دیا گیا ہے کہ طلبہ میں برداشت، انسانیت اور معاشرتی ہم آہنگی جیسے اوصاف پروان چڑھ سکیں۔
ڈاکٹر تبسم ناز کی شرکت اور پاکستان کے تعلیمی اقدامات کو عالمی سطح پر سراہا گیا۔ انہوں نے اس عمل کو ملکی وقار کے لیے اہم سنگ میل قرار دیتے ہوئے امید ظاہر کی کہ پاکستان کی نئی نسل ملکی و عالمی سطح پر مثبت کردار ادا کرے گی۔
