یونیسف پاکستان نے بچوں کے آن لائن تحفظ کے لیے ایک خصوصی کیمپ کا انعقاد کیا، جس میں مختلف طبقہ ہائے فکر سے تعلق رکھنے والے نوجوانوں نے بھرپور شرکت کی۔ اس کیمپ میں بچوں کو انٹرنیٹ کے محفوظ استعمال، آن لائن زیادتی سے بچاؤ، ذہنی صحت کا خیال رکھنے اور ہراسانی کی رپورٹنگ جیسے اہم موضوعات پر تربیت دی گئی۔
اس کیمپ کی میزبانی یونیسف پاکستان نے نیشنل کمیشن آن دی رائٹس آف چائلڈ، ٹیلی نار پاکستان، میٹا، نیشنل سی ای آر ٹی پاکستان اور پاکستان ٹیلی کمیونیکیشن اتھارٹی کے تعاون سے کی۔ بچوں کی رہنمائی کے عمل میں نیشنل کمیشن آن دی رائٹس آف چائلڈ کے چائلڈ ایڈوائزری پینل، پاکستان گرل گائیڈز ایسوسی ایشن اور مختلف اقلیتی برادریوں کے نمائندہ نوجوان بھی شامل تھے۔
کیمپ کے دوران بچوں کو تفریحی کھیلوں، گروپ سرگرمیوں، ساتھیوں سے گفتگو اور ماہرین کے سوال و جواب سیشن کے ذریعے نہ صرف آگاہی فراہم کی گئی بلکہ انہیں اپنی آواز اٹھانے اور بہتر رہنمائی کے مواقع بھی دیے گئے۔ آنے والے نوجوانوں نے اپنی ذہانت اور جرات مندانہ خیالات کے ساتھ اس عزم کا اظہار کیا کہ وہ انٹرنیٹ کو ہر بچے کے لیے مزید محفوظ بنانے کے لیے سرگرم رہیں گے۔
