پاکستان ماحولیاتی تحفظ ایجنسی (پاک ای پی اے) کی انفورسمنٹ ٹیم نے اسلام آباد کے سنگجانی علاقے میں ماربل اور گرینائٹ کی صنعتی یونٹس کا معائنہ کیا ہے۔ اس دوران ٹیم نے یونٹس میں فضائی آلودگی، نامناسب ویسٹ مینجمنٹ اور آلودگی پر قابو پانے کے انتظامات کی کمی جیسے مسائل کا مشاہدہ کیا۔ ان غیر ذمے دارانہ رویوں سے نہ صرف ماحول تباہ ہو رہا ہے بلکہ ارد گرد رہنے والی آبادی کی صحت کو بھی شدید خطرات لاحق ہو رہے ہیں۔
معائنہ کے دوران انفورسمنٹ ٹیم نے ماحولیاتی قوانین کی خلاف ورزی پر سنگجانی میں واقع متعدد ماربل اور گرینائٹ یونٹس کو شوکاز نوٹس جاری کیے ہیں۔ ان صنعتی یونٹس کو ہدایت کی گئی ہے کہ وہ ایجنسی کے سامنے پیش ہوکر اپنے ماحولیاتی ضوابط پر عملدرآمد کی موجودہ صورت حال پیش کریں۔ پاک ای پی اے کے مطابق اس قسم کی کارروائیوں کا مقصد صنعتی شعبے میں ماحول دوست اقدامات کو یقینی بنانا اور عوام کی صحت کے تحفظ کو ترجیح دینا ہے۔
