راولپنڈی ڈویلپمنٹ اتھارٹی میں پبلک سیکٹر مینجمنٹ اینڈ گورننس کورس کے افسران نے معلوماتی دورہ کیا، جس میں انہیں آر ڈی اے کے انتظامی و ترقیاتی کاموں سے عملی طور پر روشناس کرایا گیا۔ اس تربیتی دورے سے افسران کو شہری ترقی اور عوامی خدمات کے شعبے میں مربوط حکمرانی کی اہمیت کو سمجھنے کا موقع ملا۔
یہ کورس پنجاب انسٹیٹیوٹ آف مینجمنٹ اینڈ پروفیشنل ڈیولپمنٹ کے زیرِ انتظام جاری ہے، جس کے تحت پنجاب کے مختلف اضلاع سے تعلق رکھنے والے 43 افسران نے دورہ کیا۔ شرکاء میں اسسٹنٹ ڈائریکٹرز، تحصیل پاپولیشن ویلفیئر آفیسرز، ڈیموگرافرز، ڈپٹی ڈسٹرکٹ اکاؤنٹ آفیسرز، اسسٹنٹ ڈسٹرکٹ اٹارنیز سمیت دیگر شعبہ جات کے افسران شامل تھے۔
دورے کے دوران ایڈیشنل ڈائریکٹر جنرل آر ڈی اے منصور احمد خان نے شرکاء کو آر ڈی اے کی انتظامی ساخت، اہم ذمہ داریوں اور درپیش چیلنجز پر تفصیلی بریفنگ دی۔ انہوں نے ادارے کی تاریخ کے ساتھ ساتھ جاری اور آنے والے منصوبوں پر بھی روشنی ڈالی، خصوصاً رنگ روڈ پروجیکٹ، نالہ لئی پروجیکٹ اور دیگر ترقیاتی اقدامات کا تذکرہ کیا۔
ایڈیشنل ڈائریکٹر جنرل کا کہنا تھا کہ اس نوعیت کے تربیتی کورسز سرکاری افسران کے لیے بے حد فائدہ مند ہیں۔ یہ انہیں ترقیاتی اداروں کی عملی ذمہ داریوں سے آگاہ کرنے کے ساتھ مؤثر حکمرانی کے لیے بصیرت فراہم کرتے ہیں۔
اس موقع پر آر ڈی اے کے اہم افسران، ڈائریکٹر ایڈمن اینڈ فنانس قاضی صہیب احمد اور ڈپٹی ڈائریکٹر ایڈمن افتخار علی بھی موجود تھے۔ شرکاء نے اس دورے کو سیکھنے کا قیمتی موقع قرار دیتے ہوئے شہری شعبے میں مربوط منصوبہ بندی اور موثر انتظام کی اہمیت کو سراہا۔
