وزیراعلیٰ سندھ مراد علی شاہ نے بھٹ شاہ میں ہونے والی لطیف ایوارڈ تقریب میں بھٹو خاندان کی خدمات اور صوفی عزم کا بھرپور اعتراف کیا۔ شاہ عبداللطیف بھٹائی کے عرس کے موقع پر ہونے والی اس تقریب میں پاکستان پیپلز پارٹی کے چیئرمین بلاول بھٹو زرداری بھی شریک ہوئے۔
مراد علی شاہ نے اپنی تقریر کی ابتدا میں چیئرمین بلاول بھٹو زرداری کا شکریہ ادا کیا اور کہا کہ بھٹو خاندان کا بھٹ شاہ سے دہائیوں پرانا گہرا تعلق ہے۔ انہوں نے بتایا کہ شہید ذوالفقار علی بھٹو نے 64 سال قبل یہاں ثقافتی مرکز کی بنیاد رکھی تھی۔ وزیراعلیٰ نے یہ بھی یاد دلایا کہ محترمہ بے نظیر بھٹو نے بھی بھٹ شاہ میں شاہ عبداللطیف بھٹائی کے 250ویں عرس میں شرکت کی اور ایک طویل خطاب کیا تھا جس میں زیادہ تر بات چیت سندھی زبان میں ہوئی۔
مراد علی شاہ نے بے نظیر بھٹو کی اُس تاریخی تقریر کے اقتباسات بھی پیش کیے اور اُن کے اس معروف قول کو دہرایا: "بھٹائی کے بغیر سندھ کو اور سندھ کے بغیر بھٹائی کو سمجھنا مشکل ہے۔” انہوں نے کہا کہ آج بھی بے نظیر بھٹو کی باتیں نوجوانوں کے لیے مشعل راہ ہیں جن میں تعلیم اور محنت پر زور دیا گیا تھا۔ وزیراعلیٰ نے بتایا کہ بے نظیر بھٹو نے بھٹائی کی شاعری کا مجموعہ ‘گنج شریف’ اپنے خرچے پر شائع کروا کر تمام یونیورسٹیوں تک پہنچایا۔
ماضی اور حال کو جوڑتے ہوئے مراد علی شاہ نے کہا کہ بلاول بھٹو زرداری کی آج کی آمد 31 سال بعد ایک روایت کو تازہ کررہی ہے۔ وزیراعلیٰ مراد علی شاہ نے بے نظیر بھٹو کی امن و مزاحمت پر مبنی پراثر نصیحت بھی دہرائی: "اگر تم گولی کا استعمال کرو گے تو ہم مقابلہ کرنا جانتے ہیں، اور اگر تم شاہ لطیف کی زبان میں بات کرو گے تو ہم تمہارے ساتھ ہیں۔” انہوں نے انتباہ کیا کہ آج جو بھی تشدد کا راستہ اپنائے گا اسے بھرپور جواب ملے گا۔
وزیراعلیٰ سندھ نے تقریب میں صوفی یونیورسٹی کے قیام کا بھی ذکر کیا جو ان کے مطابق صدر آصف علی زرداری نے محترمہ بے نظیر بھٹو کے وژن کے مطابق ایک سنٹر آف ایکسیلینس قائم کرنے کے لیے بنائی۔ مراد علی شاہ نے یقین دلایا کہ سندھ حکومت بلاول بھٹو کی رہنمائی میں صوفیوں کے پیغام اور وژن کو آگے بڑھاتی رہے گی۔
اختتام پر وزیراعلیٰ نے یوم آزادی کی خصوصی اہمیت کو اجاگر کرتے ہوئے کہا کہ اس سال پاکستان کے بھارت کے خلاف "اتحاد و یگانگت” سے حاصل کی گئی کامیابی، جسے ‘بنیان المرسوس’ کا نام دیا گیا، کو ‘معرکہ حق’ کے عنوان سے منایا جارہا ہے۔ انہوں نے کہا کہ اس سال شاہ لطیف کا عرس بھی اسی قومی جوش و جذبے کے ساتھ منایا گیا ہے۔
