پنجاب میں کھیلوں کے شعبے کی ترقی کے لئے اہم اقدامات کیے جا رہے ہیں، جن پر ہونے والے ایک اعلیٰ سطحی اجلاس میں نئی ترقیاتی سکیموں کی منظوری دی گئی ہے۔ سیکرٹری سپورٹس پنجاب مظفر خان سیال کی زیر صدارت اس اجلاس میں ڈائریکٹر جنرل سپورٹس خضرافضال چودھری، ایڈیشنل سیکرٹری میاں عثمان علی، ایکٹنگ پی ڈی پی ایم یو فرحان اور ڈپٹی ڈائریکٹر طارق خانزادہ نے بھی شرکت کی۔
اجلاس کے دوران کھیلوں کے مختلف انفراسٹرکچر کو جدید خطوط پر استوار کرنے سے متعلق کئی اہم فیصلے کیے گئے۔ سیکرٹری سپورٹس پنجاب کا کہنا تھا کہ نشتر پارک سپورٹس کمپلیکس میں اوپن والی بال کورٹ تعمیر کیا جائے گا جبکہ لاہور میں جدید آرچری ايرینا بھی بنایا جائے گا۔ اس کے علاوہ نشتر پارک میں واقع سپورٹس ہوسٹل کی اپ گریڈیشن اور پنجاب اسٹیڈیم کی بہتری کا فیصلہ بھی کیا گیا۔
مزید برآں، پنجاب اسٹیڈیم لاہور سمیت صوبے کے دیگر اسٹیڈیمز کے گرد دکانیں بنانے کا پلان زیر غور آیا۔ ڈی جی خان میں تحصیل سطح کا سپورٹس کمپلیکس تعمیر کرنے کا بھی اعلان سامنے آیا ہے۔ سیکرٹری سپورٹس پنجاب نے زور دیا کہ کھیلوں کے جدید انفراسٹرکچر کی تعمیر کو ترجیح دی جائے گی اور متعلقہ افسران کو ہدایت کی کہ اس عمل میں درپیش این او سی اور دیگر مسائل کو جلد از جلد حل کیا جائے تاکہ منصوبہ بندی پر بروقت عملدرآمد یقینی بنایا جا سکے۔
