اسلام آباد: انسٹی ٹیوٹ آف اسٹریٹجک اسٹڈیز اسلام آباد (آئی ایس ایس آئی) میں ایک سادہ تقریب کے دوران آئی ایس ایس آئی اور سری لنکا کے ساؤتھ ایشیا سسٹین ایبلٹی اینڈ سکیورٹی ریسرچ انسٹی ٹیوٹ (ساسری) کے درمیان مفاہمت کی یادداشت پر دستخط کیے گئے۔
یہ مفاہمتی یادداشت آئی ایس ایس آئی کی بین الاقوامی سطح پر روابط بڑھانے کی کوششوں کا حصہ ہے، جس کے تحت خصوصاً علاقائی شراکت داروں کے ساتھ ادارہ جاتی تعاون کے مؤثر طریقہ کار کو فروغ دینا مقصود ہے۔ معاہدے کا مقصد باہمی دلچسپی کے امور پر تحقیق، پالیسی ڈائیلاگ، مشترکہ اشاعتوں اور تقاریب کے ذریعے دونوں اداروں کے درمیان تعاون کو مستحکم بنانا ہے۔
تقریب میں آئی ایس ایس آئی اور ساسری کی قیادت کے علاوہ کولمبو میں پاکستان کے ہائی کمشنر میجر جنرل ڈاکٹر نیّر نصیر، ہلالِ امتیاز (ملٹری)، اور اسلام آباد میں سری لنکا کے ڈپٹی ہائی کمشنر مسٹر اے کرسٹی روبن نے بھی شرکت کی۔
شرکا نے پاکستان اور سری لنکا کے برادرانہ تعلقات کی تاریخ پر روشنی ڈالی، جن میں سفارتی اور دفاعی روابط کے ساتھ ثقافتی اور انسانی ہمدردی کے شعبے بھی شامل ہیں۔ اس موقع پر اس امر پر اتفاق کیا گیا کہ ایک خوشحال اور باہم مربوط جنوبی ایشیا کے لیے خطے کے ممالک کو مسلسل رابطے، مکالمے اور فعال تعاون کے ذریعے ایک دوسرے کے قریب آنا ہوگا۔
جنوبی ایشیا میں اجتماعی ترقی کے لیے علاقائی تعاون کے کردار پر زور دیتے ہوئے جنوبی ایشیائی تنظیم برائے علاقائی تعاون (سارک) کی بحالی کی ضرورت کو خاص طور پر اجاگر کیا گیا۔
مفاہمتی یادداشت کے تحت مشترکہ تقاریب، پالیسی پیپرز اور محققین کے تبادلے کے پروگرامز جیسے عملی اقدامات تجویز کیے گئے۔ دونوں تھنک ٹینکس کی قیادت نے اس عزم کا اظہار کیا کہ وہ پاکستان اور سری لنکا میں بہتر پالیسی مباحث اور باخبر عوامی آرا کی تشکیل کے لیے مشترکہ طور پر کام کریں گے۔
