اسلام آباد: چیئرمین سینیٹ سید یوسف رضا گیلانی سے وزیر برائے پارلیمانی امور طارق فضل چوہدری نے اسلام آباد میں ان کی رہائش گاہ پر ملاقات کی، جس میں پارلیمانی امور، قانون سازی کے عمل اور ایوانِ بالا و وزارتِ پارلیمانی امور کے درمیان مؤثر رابطہ کاری سے متعلق معاملات پر تبادلہ خیال کیا گیا۔
سینیٹ سیکرٹریٹ کے میڈیا ڈائریکٹوریٹ کے مطابق ملاقات میں باہمی دلچسپی کے دیگر امور بھی زیرِ غور آئے۔ دونوں جانب سے پارلیمانی اداروں کے مؤثر کردار کو مزید مضبوط بنانے اور جمہوری عمل کے استحکام کے لیے تعاون بڑھانے پر اتفاق کیا گیا۔
چیئرمین سینیٹ سید یوسف رضا گیلانی نے کہا کہ پارلیمان اور حکومت کے درمیان مؤثر رابطہ قانون سازی کے عمل کو سہل بنانے اور عوامی اہمیت کے امور پر بروقت پیش رفت کے لیے ضروری ہے۔ انہوں نے پارلیمانی کاروبار کی انجام دہی میں ادارہ جاتی تعاون اور معاونت کو مزید بہتر بنانے کی ضرورت پر زور دیا۔
وزیر برائے پارلیمانی امور طارق فضل چوہدری نے چیئرمین سینیٹ کو یقین دہانی کرائی کہ وزارتِ پارلیمانی امور پارلیمانی معاملات میں مکمل تعاون اور معاونت فراہم کرے گی۔
دونوں رہنماؤں نے اس عزم کا اظہار کیا کہ سینیٹ اور وزارتِ پارلیمانی امور کے درمیان قریبی اور مؤثر رابطہ کاری کو مزید تقویت دی جائے گی تاکہ قانون سازی اور دیگر پارلیمانی امور خوش اسلوبی سے جاری رہیں۔ ملاقات میں پارلیمان کے وقار کو برقرار رکھنے اور اس کی مؤثر کارکردگی میں اضافے کے لیے مشترکہ کوششیں جاری رکھنے پر بھی اتفاق کیا گیا۔
