کراچی، 15 جولائی 2026: مشرق پاکستان، جو مینا خطے کے نمایاں مالیاتی اداروں میں شامل مشرق کا حصہ ہے، نے محمد عمر الیاس کو پاکستان آپریشنز کے لیے چیف انفارمیشن آفیسر مقرر کرنے کا اعلان کیا ہے۔ بینک کے مطابق یہ تقرری پاکستان میں ٹیکنالوجی، جدت اور ڈیجیٹل بینکنگ صلاحیتوں میں مسلسل سرمایہ کاری کے عزم کو تقویت دیتی ہے۔
محمد عمر الیاس ٹیکنالوجی لیڈرشپ، ڈیجیٹل ٹرانسفارمیشن اور بڑے پیمانے کے آئی ٹی آپریشنز میں 22 سال سے زائد تجربہ رکھتے ہیں۔ انہوں نے ٹیلی کمیونی کیشنز اور مالیاتی خدمات کے شعبوں میں ادارہ جاتی سطح پر تبدیلی کے منصوبوں، مضبوط ٹیموں کی تشکیل اور مستقبل کے تقاضوں سے ہم آہنگ ٹیکنالوجی ایکو سسٹمز کی فراہمی میں نمایاں کردار ادا کیا ہے۔
اپنی حالیہ قائدانہ ذمہ داریوں کے دوران، پی ٹی سی ایل گروپ اور یو بینک میں عمر الیاس نے ڈیٹا سینٹر حکمت عملی، اس کی تعیناتی اور آپریشنز، کلاؤڈ ٹرانسفارمیشن، اور پیچیدہ کور بینکنگ ٹرانسفارمیشن پروگرامز کی قیادت کی۔ ان پروگرامز میں ڈیجیٹل بینکنگ پلیٹ فارمز اور متعلقہ ایپلی کیشنز بھی شامل تھیں۔ انہوں نے بڑے پیمانے پر ڈیجیٹلائزیشن اقدامات کو آگے بڑھایا، پیچیدہ ٹیکنالوجی نظاموں کو منظم کیا اور داخلی آپریشنز کے ساتھ ساتھ صارفین سے متعلق پلیٹ فارمز پر مؤثر حل فراہم کیے۔
چیف انفارمیشن آفیسر کی حیثیت سے محمد عمر الیاس مشرق پاکستان کے ڈیجیٹل ٹرانسفارمیشن ایجنڈے کو آگے بڑھانے، ٹیکنالوجی پلیٹ فارمز اور اختراعی صلاحیتوں کو مضبوط بنانے، اور کلاؤڈ، مصنوعی ذہانت اور ایڈوانسڈ اینالیٹکس جیسی جدید ٹیکنالوجیز کے استعمال میں تیزی لانے میں اہم کردار ادا کریں گے، تاکہ حقیقی معنوں میں ڈیجیٹل فرسٹ بینکنگ تجربہ فراہم کیا جا سکے۔
اس تقرری پر تبصرہ کرتے ہوئے مشرق پاکستان کے چیف ایگزیکٹو آفیسر محمد ہمایوں سجاد نے کہا کہ پاکستان میں مشرق کی موجودگی کو مضبوط بنانے کے عمل میں ٹیکنالوجی ذمہ دارانہ، محفوظ اور مؤثر انداز میں ترقی کے لیے مرکزی حیثیت رکھے گی۔ انہوں نے کہا کہ عمر الیاس تبدیلی کے شعبے میں مضبوط تجربہ رکھتے ہیں، جبکہ یہ اقدام مضبوط مقامی صلاحیتوں کی تعمیر اور پاکستان کے صارفین کی توقعات سے ہم آہنگ جدید، قابل اعتماد بینکنگ تجربہ فراہم کرنے کے طویل مدتی عزم کی عکاسی کرتا ہے۔
اپنی تقرری پر محمد عمر الیاس نے کہا کہ مشرق نے مختلف مارکیٹوں میں جدت اور آپریشنل نظم و ضبط کو یکجا کرنے کے حوالے سے مضبوط ساکھ قائم کی ہے۔ انہوں نے کہا کہ پاکستان کا بینکنگ شعبہ ڈیجیٹل ترقی کے ایک اہم مرحلے میں داخل ہو رہا ہے، جہاں صارفین کے تجربے، آپریشنل لچک اور مستقبل کی توسیع کے لیے ٹیکنالوجی کی بنیادوں کو مضبوط کرنے کا قابل ذکر موقع موجود ہے۔ انہوں نے کہا کہ وہ ٹیم کے ساتھ اس سفر میں کردار ادا کرنے کے منتظر ہیں۔
محمد عمر الیاس ٹیکنالوجی اور قیادت کے شعبوں میں مضبوط تعلیمی اور پیشہ ورانہ بنیاد رکھتے ہیں۔ ان کی اسناد میں یو سی برکلے، امریکا سے سرٹیفائیڈ سی ٹی او، نیشنل یونیورسٹی آف سنگاپور سے سی آئی او پریکٹسز میں سرٹیفیکیشن، انفارمیشن سیکیورٹی میں ماسٹرز ڈگری اور کمپیوٹر انجینئرنگ میں ماسٹرز ڈگری شامل ہیں۔
