نیویارک میں پاکستان کے قونصل جنرل آصف احمد اطوزئی نے برائلیئنس فاؤنڈیشن کے نمائندوں سے ملاقات کی جنہوں نے انہیں پاکستان میں اپنی تعلیمی اور سماجی ترقی سے متعلق سرگرمیوں پر بریفنگ دی۔ ملاقات میں خاص طور پر وظیفہ پروگرام زیرِ بحث آیا جو ادارہ یونیورسٹی آف آزاد جموں و کشمیر کے ساتھ مل کر شروع کر رہا ہے۔فاؤنڈیشن کے نمائندوں کے مطابق اس پروگرام کے تحت 2025 کے بیچ کے 30 طلبہ کو ان کی پوری ڈگری مدت کے دوران وظیفہ دیا جائے گا۔ اس منصوبے کی مجموعی مالیت تقریباً پینتالیس ہزار امریکی ڈالر بتائی گئی ہے اور اس کا مقصد یتیم اور مالی طور پر کمزور طلبہ کی تعلیمی مدد کرنا ہے۔ملاقات کے دوران فاؤنڈیشن نے آن لائن تعلیم اور طلبہ کی معاونت سے متعلق اپنے دیگر پروگراموں کی تفصیلات بھی پیش کیں، جن کا مقصد پاکستان میں مستحق نوجوانوں کے لیے تعلیمی مواقع بڑھانا ہے۔ قونصل جنرل نے اس موقع پر فاؤنڈیشن کی کوششوں کو سراہا اور کہا کہ ایسے اقدامات پاکستان میں تعلیم کے فروغ اور کم آمدنی والے طبقے کے طلبہ کی عملی مدد میں اہم کردار ادا کرتے ہیں۔انہوں نے پاکستانی نژاد برادری کی جانب سے تعلیم اور سماجی ترقی کے شعبوں میں دی جانے والی خدمات کو بھی قابلِ تحسین قرار دیا۔ نیویارک میں ہونے والی یہ ملاقات اس بات کی عکاس تھی کہ بیرون ملک مقیم پاکستانی ادارے اپنے وطن میں تعلیمی بہتری کے لیے مسلسل کردار ادا کر رہے ہیں۔
برائلیئنس فاؤنڈیشن کے وظیفہ پروگرام پر مشاورت
کوئی تبصرہ نہیں ہے۔
