اسلام آباد، ۹ جون ۲۰۲۶۔ پارلیمنٹ ہاؤس میں اسپیکر قومی اسمبلی سردار ایاز صادق کی زیرِ صدارت وزیر اعلیٰ بلوچستان میر سرفراز بگٹی اور گورنر بلوچستان شیخ جعفر خان مندوخیل سے ملاقات ہوئی۔ اس موقع پر صوبائی وزیر برائے مواصلات و تعمیرات سلیم خان کھوسہ بھی موجود تھے۔ ملاقات میں وفاق اور صوبہ بلوچستان کے مابین روابط، باہمی تعاون اور ہم آہنگی کے فروغ پر تفصیلی گفتگو کی گئی۔شرکاء نے بلوچستان میں جاری ترقیاتی منصوبوں، عوامی فلاح و بہبود کے اقدامات اور بنیادی ڈھانچے کی بہتری کے امور کا جائزہ لیا اور ان منصوبوں کی بروقت تکمیل کے لیے ضروری رابطوں پر اتفاق کیا۔ بلوچستان ملاقات کے دوران صوبے کی مجموعی ترقی، عوامی سہولتوں میں بہتری اور روزمرہ مسائل کے پائیدار حل پر زور دیا گیا۔اسپیکر نے وفاق اور بلوچستان کے درمیان مؤثر رابطوں، باہمی اعتماد اور قریبی تعاون کو مزید مضبوط بنانے کی ضرورت پر زور دیا اور کہا کہ بلوچستان ملک کی ترقی اور استحکام میں کلیدی اہمیت رکھتا ہے۔ انہوں نے صوبائی ترجیحات کو مؤثر انداز میں آگے بڑھانے کے لیے باقاعدہ رابطوں اور مربوط حکمتِ عملی کی ضرورت پر بھی بات کی۔ملاقات میں شرکاء نے جمہوری اداروں کے استحکام، پارلیمانی روایات کے فروغ اور بین الصوبائی ہم آہنگی کے عزم کا اعادہ کیا۔ وزیر اعلیٰ اور گورنر نے بلوچستان کی ترقی اور عوامی فلاح کے لیے اسپیکر کی دلچسپی اور تعاون کو سراہا اور وفاق و صوبے کے درمیان مثبت اشتراکِ عمل کو مزید فروغ دینے کے عزم کا اظہار کیا۔ ملاقات کے دوران متعلقہ امور پر مسلسل رابطے اور مشترکہ کوششوں کی افادیت پر اتفاق رائے قائم رہا۔
اسپیکر کی بلوچستان قیادت سے اہم ملاقات
کوئی تبصرہ نہیں ہے۔
