پاکستان اسپورٹس بورڈ کے پنشنرز کا ڈی جی پی ایس بی سے فوری پنشن ادائیگی کا مطالبہ
اسلام آباد: پاکستان اسپورٹس بورڈ (پی ایس بی) کے ریٹائرڈ ملازمین اور بیواؤں کے ایک وفد نے ڈائریکٹر جنرل پاکستان اسپورٹس بورڈ محی الدین احمد وانی سے ملاقات کی اور انہیں پنشن کی بروقت ادائیگی سے متعلق مسائل سے آگاہ کیا۔
وفد نے مؤقف اختیار کیا کہ موجودہ پنشن نظام 1980 میں نیشنل اسپورٹس ٹرسٹ (NST) کے پاکستان اسپورٹس بورڈ میں انضمام کے بعد مختلف حکومتی فیصلوں، وفاقی محتسب کی ہدایات اور متعلقہ وزارتوں کے احکامات کے تحت قائم کیا گیا تھا، جس کے مطابق پی ایس بی کو ریٹائرڈ ملازمین کو پنشن ادا کرنے کا اختیار دیا گیا۔
وفد نے بتایا کہ 1984 میں پی ایس بی کی جنرل باڈی اور ایگزیکٹو کمیٹی نے پنشن اسکیم اور قواعد کی منظوری دی تھی جبکہ 2008 میں وزارتِ کھیل نے اس اسکیم کو باضابطہ گزٹ نوٹیفکیشن کے ذریعے نافذ کیا۔ بتایا گیا کہ 2006 سے پی ایس بی اپنے محدود وسائل سے پنشن ادا کر رہا ہے، جس سے اس وقت 250 سے زائد ریٹائرڈ ملازمین اور 42 فیملی پنشنرز مستفید ہو رہے ہیں۔
وفد نے وضاحت کی کہ مارچ 2006 کے بعد کنٹری بیوٹری پروویڈنٹ فنڈ (CPF) کی کٹوتیاں بند ہونے کے باعث پرانا نظام عملاً غیر مؤثر ہو چکا ہے، اسی لیے متبادل کنٹری بیوٹری نظام کا نفاذ مشکل بن گیا ہے۔
اس موقع پر وفد نے آگاہ کیا کہ پی ایس بی بورڈ نے 2025 میں پنشن نظام کو زیادہ پائیدار بنانے کے لیے کنٹری بیوٹری پنشن فنڈ کے قیام کی منظوری دی، جس کے تحت جولائی 2025 سے ریٹائرڈ ملازمین سے 10 فیصد، 72 سال سے زائد عمر کے پنشنرز سے 20 فیصد جبکہ ریگولر ملازمین سے 10 فیصد کٹوتیاں کی جا رہی ہیں۔
وفد نے اس بات پر بھی تشویش کا اظہار کیا کہ پاکستان اسپورٹس بورڈ میں بڑی تعداد میں افسران ڈیپوٹیشن پر تعینات ہیں، جبکہ اخراجات میں توازن اور ادارے کے اندر انصاف کو یقینی بنانے کے لیے ایسے اخراجات کی عقلی بنیادوں پر تنظیمِ نو کو پنشن کی بروقت ادائیگی سے جوڑنا ضروری ہے۔
وفد نے مطالبہ کیا کہ عیدالاضحیٰ کے پیش نظر اپریل اور مئی 2026 کی پنشن فوری طور پر جاری کی جائے تاکہ ریٹائرڈ ملازمین اور ان کے اہل خانہ مالی مشکلات سے بچ سکیں۔ اس حوالے سے پنشنرز اور بیواؤں کی جانب سے ڈائریکٹر جنرل پاکستان اسپورٹس بورڈ کے نام ایک دستخط شدہ خط بھی پیش کیا گیا۔
ڈائریکٹر جنرل پاکستان اسپورٹس بورڈ محی الدین احمد وانی نے وفد کے مسائل غور سے سنے اور یقین دہانی کرائی کہ پنشنرز کے معاملات کو ترجیحی بنیادوں پر حل کیا جائے گا۔
