اسلام آباد میں مدرز ڈے تقریب، خواتین کی صلاحیتوں اور ویمن امپاورمنٹ کو اجاگر کیا گیا
اسلام آباد: ایئرپورٹ ہاؤسنگ سوسائٹی اسلام آباد میں مدرز ڈے کے موقع پر ایک خصوصی تقریب کا انعقاد کیا گیا جس میں 50 سے زائد خواتین نے شرکت کی۔ تقریب کا مقصد ماؤں کو خراجِ تحسین پیش کرنا، خواتین کے کردار کو اجاگر کرنا اور گھریلو سطح پر کاروبار کرنے والی باصلاحیت خواتین کی حوصلہ افزائی کرنا تھا۔
تقریب کا اہتمام محترمہ طاہرہ اشفاق نے محترمہ سلمیٰ شاہ کے تعاون سے کیا جبکہ اشہال کاسمیٹکس، محترمہ عظمیٰ، شازیہ یعقوب، صائمہ شاہد اور دیگر خواتین نے بھی پروگرام میں اہم کردار ادا کیا۔
تقریب میں اس بات پر زور دیا گیا کہ دنیا میں کوئی دن ماں کے بغیر مکمل نہیں کیونکہ ہر دن دراصل ماؤں کے نام ہوتا ہے۔ مرحوم ماؤں کے ایصالِ ثواب کے لیے خصوصی دعائیں کی گئیں جبکہ زندہ ماؤں کی صحت، خوشی اور درازیٔ عمر کے لیے بھی دعا کی گئی۔
مقررین نے کہا کہ مائیں معاشرے کی بنیاد ہیں اور محبت، تربیت، تعلیم اور اچھے اخلاق کے ذریعے نئی نسل کی تعمیر میں اہم کردار ادا کرتی ہیں۔ شرکاء نے اس بات پر بھی گفتگو کی کہ آج کی مائیں گھریلو اور سماجی ذمہ داریاں بیک وقت نبھا رہی ہیں۔
تقریب کا ایک اہم مقصد گھروں سے کاروبار کرنے والی خواتین کی حوصلہ افزائی بھی تھا۔ منتظمین نے کہا کہ بہت سی خواتین ہاتھ سے تیار اشیاء، کڑھائی، ملبوسات اور دستکاری کے ذریعے اپنے خاندان کی کفالت میں اہم کردار ادا کر رہی ہیں اور انہیں مناسب مواقع اور حوصلہ افزائی فراہم کی جانی چاہیے۔
تقریب میں پاکستان ویمن امپاورمنٹ کا پیغام بھی دیا گیا۔ شرکاء نے زور دیا کہ شہروں اور دیہاتوں میں موجود ہنر مند خواتین، خاص طور پر روایتی کڑھائی، دستکاری، برائیڈل اور کیژول ڈریسز بنانے والی خواتین کی صلاحیتوں کو قومی سطح پر متعارف کرایا جائے۔
منتظمین نے کہا کہ پاکستان کی ہاتھ سے بنی مصنوعات ملک کی ثقافتی شناخت ہیں اور اگر انہیں مناسب پلیٹ فارمز، نمائشوں اور آن لائن مارکیٹنگ کے ذریعے فروغ دیا جائے تو یہ خواتین کے لیے آمدن اور خودمختاری کا اہم ذریعہ بن سکتی ہیں۔
تقریب میں مختلف سرگرمیوں کا بھی اہتمام کیا گیا جن میں طاہرہ اشفاق کی جانب سے منعقدہ کوئز سرگرمی نے شرکاء کی بھرپور توجہ حاصل کی۔
منتظمین نے “کیکس اینڈ کیک” کی جانب سے تیار کیے گئے خصوصی مدرز ڈے کیک کو بھی سراہا، جسے شرکاء نے خوبصورت انداز، محنت اور ذائقے کے اعتبار سے بے حد پسند کیا۔
شرکاء نے مطالبہ کیا کہ حکومت، نجی شعبہ اور اوورسیز پاکستانی ہنر مند خواتین کو مالی معاونت، کاروباری مواقع اور “میڈ اِن پاکستان” مصنوعات کی تشہیر کے ذریعے سپورٹ کریں تاکہ خواتین معاشی طور پر مزید مضبوط ہو سکیں۔
Read in English: Mother’s Day Event Highlights Women’s Skills, Love for Mothers and Community Welfare in Islamabad
