راولپنڈی میں سوئی گیس پائپ لائن کا افتتاح، عوامی سہولتوں کی فراہمی حکومت کی ترجیح قرار
راولپنڈی — بیرسٹر دانیال چوہدری، وفاقی پارلیمانی سیکرٹری برائے اطلاعات و نشریات، نے چکلالہ اسکیم تھری میں نئی سوئی گیس پائپ لائن کا افتتاح کر دیا۔ اس موقع پر انہوں نے کہا کہ پاکستان سے بڑھ کر کوئی سیاسی رہنما نہیں اور ملک کے وقار کو نقصان پہنچانے کی کسی کو اجازت نہیں دی جا سکتی۔
تقریب سے خطاب کرتے ہوئے انہوں نے کہا کہ پاکستان کے خلاف مہم چلانے والے عناصر اور ان کے سہولت کار بے نقاب ہو چکے ہیں۔ انہوں نے مزید کہا کہ عالمی سطح پر توانائی بحران کے باوجود شہباز شریف کی قیادت میں حکومت عوام کو زیادہ سے زیادہ ریلیف فراہم کرنے کے لیے مؤثر اقدامات کر رہی ہے۔
انہوں نے کہا کہ ایران، اسرائیل اور امریکہ کے درمیان کشیدگی کے باعث عالمی سطح پر گیس اور بجلی کا بحران شدت اختیار کر گیا ہے، جس سے سپلائی چین متاثر اور قیمتوں میں اضافہ ہوا۔ تاہم حکومت نے دانشمندانہ پالیسیوں کے ذریعے ان اثرات کو کم کرنے کے لیے جامع حکمت عملی اپنائی ہے۔
بیرسٹر دانیال چوہدری نے کہا کہ پاکستان نے مشرقِ وسطیٰ میں ثالثی کا مؤثر کردار ادا کیا ہے اور عالمی سطح پر اس کی سفارتی کوششوں کو سراہا جا رہا ہے۔ انہوں نے عاصم منیر اور وزیر اعظم کی قیادت کو پاکستان کی سفارتی کامیابیوں کا باعث قرار دیا۔
انہوں نے جنیوا میں پیش آنے والے ایک واقعے پر افسوس کا اظہار کرتے ہوئے کہا کہ پی ٹی آئی کے بانی کے بیٹے کی تقریر سے پاکستان کی عالمی ساکھ کو نقصان پہنچا۔ انہوں نے پی ٹی آئی کو تنقید کا نشانہ بناتے ہوئے کہا کہ ایک طرف آئی ایم ایف کی مخالفت کی گئی اور اب جی ایس پی پلس اسٹیٹس ختم کرانے کی کوششیں کی جا رہی ہیں، جو قومی مفاد کے خلاف ہے۔
انہوں نے اس عزم کا اعادہ کیا کہ حکومت عوامی فلاح و بہبود کے لیے پرعزم ہے اور شہریوں کو بنیادی سہولیات کی فراہمی اولین ترجیح ہے۔ ترقیاتی منصوبے بروقت اور اعلیٰ معیار کے ساتھ مکمل کیے جا رہے ہیں اور کسی قسم کی غفلت یا تاخیر برداشت نہیں کی جائے گی۔
تقریب میں موجود مقامی عمائدین اور شہریوں نے حکومت کے اقدامات کو سراہتے ہوئے کہا کہ سوئی گیس پائپ لائن علاقے کا دیرینہ مطالبہ تھا، جس کی تکمیل سے بنیادی سہولیات میں نمایاں بہتری آئے گی اور عوام کو ریلیف ملے گا۔
