انٹر بورڈز کوآرڈینیشن کمیشن نے پنجاب کے تمام بورڈز کے امتحانی کنٹرولرز اور آئی ٹی افسران کا اجلاس منعقد کیا جس میں کمپیوٹر سائنس کے امتحانات کے لیے ای مارکنگ کے نفاذ پر تفصیلی غور کیا گیا۔ یہ اقدام شفافیت، درستگی، کارکردگی اور نتائج کی بروقت تیاری کو یقینی بنانے کے لیے ترتیب دیا گیا ہے۔اجلاس کی صدارت ڈائریکٹر جنرل انٹر بورڈز کوآرڈینیشن کمیشن محمد عثمان خان نے کی جبکہ ڈائریکٹر آئی ٹی فیڈرل بورڈ برائے انٹرمیڈیٹ و سیکنڈری ایجوکیشن اسلام آباد ڈاکٹر بشیر خان بھی شریک ہوئے۔ اجلاس میں عملی منصوبہ بندی، تکنیکی تیاری اور بورڈز کے درمیان ہم آہنگی پر بات چیت کی گئی تاکہ ای مارکنگ کا نفاذ بغیر خلل کے پورے پنجاب میں موثر انداز سے ہو۔شرکاء نے نظام کے انفراسٹرکچر، معاون عملے کی تربیت، سافٹ ویئر اور ڈیٹا سکیورٹی سے متعلق امور کا جائزہ لیا اور نفاذ کے دوران درپیش ممکنہ چیلنجز کے حل کے لیے باہمی تعاون کے طریقہ کار پر اتفاق کیا۔ای مارکنگ کے ذریعے نتیجہ جاتی عمل میں رفتار اور شفافیت کے فوائد پر زور دیا گیا۔اجلاس کے اختتامی کلمات ایگزیکٹو ڈائریکٹر انٹر بورڈز کوآرڈینیشن کمیشن ڈاکٹر غلام علی ملاہ نے کہے جنہوں نے تمام بورڈز میں ڈیجیٹل تیاری اور ٹیکنالوجی کے موثر انضمام کی ضرورت پر زور دیا اور اسے امتحانی نظام کی جدید کاری، معیار بندی اور شفافیت کے فروغ کے لیے اہم قدم قرار دیا۔ انٹر بورڈز کوآرڈینیشن کمیشن نے تعلیمی نظام میں تکنیکی ترقی اور ہم آہنگی کو فروغ دینے والے اقدامات کی حمایت جاری رکھنے کا عزم دہرایا۔
کمپیوٹر سائنس امتحانات میں ای مارکنگ کا نفاذ
کوئی تبصرہ نہیں ہے۔
