بارانی زرعی یونیورسٹی میں انتہاپسندی کے خاتمے کے عالمی دن کی مناسبت سے سیمینار کا انعقاد
پیر مہر علی شاہ بارانی زرعی یونیورسٹی راولپنڈی میں انتہاپسندی کے خاتمے کے عالمی دن کے موقع پر آگاہی سیمینار کا انعقاد کیا گیا، جس میں امن، برداشت، رواداری اور معاشرتی ہم آہنگی کے فروغ پر زور دیا گیا۔ وائس چانسلر پروفیسر ڈاکٹر قمر الزمان تقریب کے مہمانِ خصوصی تھے جبکہ رجسٹرار، ڈینز، ڈائریکٹرز، پرنسپل افسران، فیکلٹی ممبران اور طلبہ کی بڑی تعداد نے بھی شرکت کی۔
شرکاء سے خطاب کرتے ہوئے وائس چانسلر پروفیسر ڈاکٹر قمر الزمان نے کہا کہ یونیورسٹی ایسا علمی و تحقیقی ماحول فراہم کرنے کے لیے پرعزم ہے جو مکالمے، شمولیت، تحقیق پر مبنی سوچ اور سماجی شرکت کو فروغ دے۔ انہوں نے مزید کہا کہ طلبہ اپنی توانائیاں مثبت سرگرمیوں میں صرف کریں جو قومی ترقی اور عالمی ہم آہنگی کے فروغ کا ذریعہ بنیں۔ انہوں نے اس عزم کا اعادہ بھی کیا کہ ہم سب کو مل کر ہر قسم کی انتہاپسندی کے خلاف کھڑا ہونا ہوگا اور امن و برداشت کو فروغ دینا ہوگا۔
سابق ڈین فیکلٹی آف سوشل سائنسز، پروفیسر ڈاکٹر عبدالصبور نے نوجوانوں کے کردار کو قوم کی ترقی کا بنیادی ستون قرار دیا۔ انہوں نے قرآنی تعلیمات اور تاریخی مثالوں کی روشنی میں کہا کہ وہی اقوام ترقی کرتی ہیں جن کے نوجوان مضبوط اخلاقی اقدار، نظم و ضبط اور ذمہ داری کا مظاہرہ کرتے ہیں۔
پرنسپل آفیسر سٹوڈنٹس افیئرز، پروفیسر ڈاکٹر غلام حسین بابر نے صبر، برداشت اور باہمی احترام کو معاشرتی ہم آہنگی اور انتہاپسندی کے خاتمے کا اہم ذریعہ قرار دیا۔ انہوں نے طلبہ پر زور دیا کہ وہ مکالمے، رواداری اور امن کے فروغ میں اپنا بھرپور کردار ادا کریں۔
سیمینار کا اختتام اس اجتماعی عزم کے ساتھ ہوا کہ نوجوان نسل کو انتہاپسندی سے دور رکھتے ہوئے امن، مثبت شمولیت اور برداشت کے فروغ کے لیے ہر سطح پر کوششیں جاری رکھی جائیں گی۔
