این آر ای اسٹیپ ٹو کلینیکل اسکلز امتحان 24، 25، 31 جنوری اور یکم فروری کو منعقد ہوگا
اسلام آباد، 23 جنوری 2026: نیشنل رجسٹریشن ایگزامینیشن (این آر ای) اسٹیپ ٹو کلینیکل اسکلز ایگزامینیشن (CSE) 24 اور 25 جنوری 2026 (ہفتہ، اتوار) جبکہ 31 جنوری اور یکم فروری 2026 (ہفتہ، اتوار) کو منعقد کیا جائے گا۔ یہ امتحان کونسل ایکٹ 2022 کے سیکشن 18 کے تحت نیشنل یونیورسٹی آف میڈیکل سائنسز (NUMS) کے زیر اہتمام ہوگا۔
تمام اہل امیدواروں کو ایڈمٹ کارڈز جاری کر دیے گئے ہیں اور انہیں ہدایت کی گئی ہے کہ امتحانی مرکز پر بروقت پہنچیں۔ قانون کے مطابق این آر ای سال میں دو مرتبہ منعقد کیا جاتا ہے اور یہ امتحان ان امیدواروں کے لیے ہے جو این آر ای اسٹیپ ون کامیابی سے پاس کر چکے ہوں۔ ملک بھر سے مجموعی طور پر 1849 گریجویٹس این آر ای اسٹیپ ٹو امتحان کے لیے رجسٹرڈ ہیں۔
یہ امتحان غیر ملکی میڈیکل گریجویٹس کی کلینیکل مہارتوں اور پیشہ ورانہ صلاحیتوں کا جامع جائزہ لیتا ہے تاکہ اس امر کو یقینی بنایا جا سکے کہ وہ پاکستان میں طبی پریکٹس کے لیے مقررہ معیار پر پورا اترتے ہیں۔ پاکستانی شہریت رکھنے والے غیر ملکی گریجویٹس کے لیے کونسل میں رجسٹریشن کے حصول میں یہ امتحان کلیدی حیثیت رکھتا ہے۔
این آر ای اسٹیپ ٹو سی ایس ای میں عملی جانچ شامل ہوتی ہے، جس میں مریضوں سے تعامل، کلینیکل طریقۂ کار اور فیصلہ سازی کے مراحل شامل ہیں۔ یہ امتحان آبجیکٹو اسٹرکچرڈ کلینیکل ایگزامینیشن (OSCE) کے طرز پر ہوتا ہے، جس میں تھیوری اور سی ایس ای دونوں حصے الگ الگ پاس کرنا لازم ہے۔
تین گھنٹے سے زائد دورانیے پر مشتمل اس امتحان میں مختلف شعبہ جات کے 20 اسٹیشنز شامل ہوتے ہیں، جبکہ کامیابی کے لیے تھیوری اور سی ایس ای دونوں میں کم از کم 60 فیصد نمبر حاصل کرنا ضروری ہے۔ حکام کے مطابق یہ سخت اور شفاف امتحانی نظام طبی شعبے میں معیاری افراد کی شمولیت کو یقینی بناتا ہے اور عوامی اعتماد کو برقرار رکھتا ہے۔
امیدوار میڈیکل طلبہ کو مشورہ دیا گیا ہے کہ وہ صرف پاکستان میڈیکل اینڈ ڈینٹل کونسل (PM&DC) کی منظور شدہ بین الاقوامی تعلیمی اداروں میں داخلہ لیں تاکہ معیاری تعلیم حاصل کر کے وطن واپسی پر لائسنسنگ امتحان میں کامیاب ہو سکیں اور قومی صحت کے نظام میں مؤثر خدمات انجام دے سکیں۔
