مسلم اسٹوڈنٹس کا سات روزہ فہمِ دین کورس

راولپنڈی سے موصولہ اطلاع کے مطابق مسلم سٹوڈنٹس آرگنائزیشن پاکستان طلبہ کی فکری، نظریاتی اور عملی تربیت کے لیے اسلام آباد میں سات روزہ فہم دین کورس کا اہتمام کر رہی ہے جو 24 تا 30 جنوری 2026 تک جاری رہے گا۔ اس کورس کا مقصد نوجوان طلبہ کو دین کا درست فہم، فکری پختگی اور عملی رہنمائی فراہم کرنا بتایا گیا ہے۔ناظم ایم ایس او راولپنڈی برادر اسامہ حنیف نے کہا کہ موجودہ دور میں فکری انتشار، نظریاتی ابہام اور میڈیا کے منفی رجحانات کے پیش نظر ایسے منظم تربیتی پروگرام وقت کی اہم ضرورت ہیں۔ اسامیہ میں واضح کیا گیا کہ فہم دین کورس اسی ضرورت کے تحت ترتیب دیا گیا ہے تاکہ طلبہ فکری استحکام کے ساتھ معاشرتی ذمہ داریوں کے لیے تیار ہوں۔کورس میں عقائد کی مضبوط بنیاد، قرآن و حدیث سے مؤثر وابستگی، سیرت اور فنِ خطابت کی عملی تربیت اور صحافت و سوشل میڈیا کے مثبت و مؤثر استعمال جیسے موضوعات شامل ہیں۔ ہر موضوع پر متعلقہ میدان کے ماہرین اور تجربہ کار افراد طلبہ کی رہنمائی کریں گے تاکہ فہم دین کورس کے شرکاء علمی اور عملی دونوں میدانوں میں مستعد بن سکیں۔ایم ایس او پاکستان کو محض ایک طلبہ تنظیم کے طور پر نہیں بلکہ ایک تربیتی و نظریاتی ادارے کے طور پر متعارف کروایا گیا ہے جو نوجوانوں کی شخصیت سازی اور معاشرتی خدمات کے لیے انہیں تیار کرتا ہے۔ اس تناظر میں فہم دین کورس ادارے کے عزم کا عینی ثبوت قرار دیا گیا ہے کہ ایم ایس او ایک باشعور اور نظریاتی طور پر مضبوط نسل کی تیاری کے لیے کوشاں ہے۔ناظم ایم ایس او راولپنڈی برادر اسامہ حنیف نے تمام طلبہ سے اپیل کی ہے کہ وہ اس علمی و فکری سفر میں شامل ہوں، بروقت رجسٹریشن کرائیں اور فہم دین کورس سے حاصل شدہ تربیت کے ذریعے اپنی دعوت، قیادت اور زندگی کے مقاصد کو بہتر طور پر سمجھیں۔ جاری کردہ اعلامیہ سفیان عباسی ناظم اطلاعات مسلم سٹوڈنٹس آرگنائزیشن ضلع راولپنڈی کی جانب سے جاری کیا گیا ہے۔