اسلام آباد میں منعقدہ تقریب میں چیئرمین پیپلز پارٹی بلاول بھٹو زرداری نے کہا کہ سندھ حکومت ہر شعبے کی بہتری کے لیے مسلسل کام کر رہی ہے اور صوبائی کوششوں کو عالمی سطح پر بھی تسلیم کیا جا رہا ہے۔بلاول بھٹو زرداری نے خصوصی طور پر صحت کے شعبے پر ہونے والی پیش رفت پر روشنی ڈالی۔ ان کے بقول پورے سندھ میں صحت کے نظام کو مضبوط بنانے کے لیے متعدد اقدامات کیے گئے ہیں اور عالمی معیار کی طبی سہولیات عوام کو مفت فراہم کی جا رہی ہیں۔ جناح اسپتال کو ترقی یافتہ معیار کے مطابق تیار کیا گیا اور این آئی سی وی ڈی میں دل کے امراض کا علاج مفت دیا جا رہا ہے۔انہوں نے کہا کہ سندھ میں این آئی سی وی ڈی طرز کے گیارہ ہسپتال قائم کیے گئے ہیں اور کینسر کے مہنگے علاج کو عوام کے لیے مفت رکھا گیا ہے۔ سندھ میں پہلی مرتبہ کینسر کے جدید علاج کے لیے سائبر نائف ٹیکنالوجی متعارف کروائی گئی تاکہ مہنگے علاج تک عوام کی رسائی ممکن بنائی جا سکے۔تعلیم کے شعبے میں بھی نمایاں اقدامات کیے گئے ہیں اور جامعات کی تعداد دگنی کی گئی ہے۔ غربت میں کمی کے لیے صوبے میں خصوصی پروگرام شروع کیے گئے اور دو لاکھ شمسی نظام تقسیم کیے گئے تاکہ دور دراز علاقوں میں بجلی اور روزگار کے امکانات بہتر ہوں۔بلاول بھٹو زرداری نے کہا کہ صوبائی حکومت کی یہ کوششیں محاصل کی وصولی اور انتظامی کارکردگی میں بھی بہتری کا باعث بنی ہیں اور ان تبدیلیوں کے مثبت اثرات عوام تک پہنچ رہے ہیں۔تقریب میں وزیراعلیٰ سندھ سید مراد علی شاہ، صوبائی وزراء جام خان شورو، سردار محمد بخش مہر، شرجیل انعام میمن، ناصر شاہ اور دیگر بھی شریک تھے۔ بلاول نے کہا کہ سندھ حکومت آئندہ بھی عوام کو معیاری خدمات فراہم کرنے کے عزم پر قائم رہے گی اور ترقیاتی کاموں کو تیزی سے آگے بڑھایا جائے گا۔
بلاول بھٹو زرداری نے سندھ حکومت کی ترقی بیان کردی
کوئی تبصرہ نہیں ہے۔
