پاکستان فٹ بال فیڈریشن اور بحرین فٹ بال ایسوسی ایشن نے رفہ میں واقع بحرینی ہیڈکوارٹر میں ایک جامع مفاہمت نامہ پر دستخط کیے، جس کا مقصد تکنیکی، انتظامی، خواتین فٹبال اور فٹسال کے شعبوں میں مستقل تعاون کو فروغ دینا ہے۔معاہدے پر دستخط معزز شیخ علی بن خلیفہ بن احمد ال خلیفہ بحریں بورڈ کے چیئرمین نے اور پاکستان فٹ بال فیڈریشن کے صدر سید محسن گیلانی نے کیے جبکہ سیکرٹری جنرل راشد الزوبی بھی موقع پر موجود تھے۔ یہ معاہدہ دونوں فریقین کے مابین مستقبل کے لیے واضح راستہ متعین کرتا ہے اور فٹبال تعاون کو باقاعدہ شکل دے گا۔معاہدے میں قومی ٹیموں اور عمر گروپ اسکواڈز کی تکنیکی ترقی کو خاص اہمیت دی گئی ہے جس کے تحت مشترکہ تربیتی کیمپس، دوستانہ میچز اور ٹیلنٹ ڈویلپمنٹ کے پروگراموں کا انعقاد طے پایا ہے تاکہ علاقائی اور بین الاقوامی مقابلوں کے لیے بہتر تیاری ممکن بنائی جا سکے۔ریفری اور قوانین کے شعبے میں ترقی کے لیے ریفری تربیتی کورسز، صلاحیت سازی کے پروگرام اور خصوصی ورکشاپس کروانے کی شق شامل ہے۔ اس کے علاوہ انتظامی اور تکنیکی معیار میں بہتری لانے کے لیے قانونی اور ضابطہ جاتی تجربات کے تبادلے کی بھی توقع ہے تاکہ دونوں فیڈریشنز کے گورننس کے طریقے عالمی معیار کے مطابق ہوں۔خواتین فٹبال کو مستحکم اور پیشہ ورانہ انداز میں آگے بڑھانے کے عزم کے تحت دونوں فریق ایک مربوط ترقیاتی حکمتِ عملی اپنانے پر متفق ہوئے ہیں جس میں شرکت بڑھانے، تکنیکی معیار بہتر بنانے اور پیشہ ورانہ ڈھانچے کو مضبوط کرنے کے اقدامات شامل ہوں گے۔ اسی طرح فٹسال کی ترقی اور اس کے فروغ کو بھی اس تعاون کا حصہ بنایا گیا ہے تاکہ مختصر میدان کے کھیل کو مقامی سطح پر مضبوط بنیاد ملے۔شیخ علی بن خلیفہ نے کہا کہ یہ معاہدہ بحرین کی جانب سے ایشیائی فیڈریشنز کے ساتھ مضبوط اور دیرپا شراکت داری کے عزم کی عکاسی کرتا ہے اور خطے میں فٹبال کی ترقی میں معاون ثابت ہوگا۔ معاہدے کے دستخط کے بعد دونوں صدور نے بحرینی ہیڈکوارٹر کے قومی کھیل کارکردگی مرکز کا بھی دورہ کیا جہاں جدید ٹیکنالوجی اور انفراسٹرکچر قومی کھلاڑیوں، کوچز اور سپورٹ اسٹاف کی تربیت کے لیے دستیاب ہے۔سید محسن گیلانی نے بحرینی فٹبال کی پیش رفت کو سراہا اور کہا کہ اس مفاہمت نامے کے ذریعے دونوں ملک طویل مدتی ٹیکنیکل اور انتظامی ہم آہنگی قائم کریں گے۔ یہ قدم پاکستان اور بحرین کے درمیان مستقبل میں فٹبال تعاون کو مضبوط بنیاد فراہم کرے گا اور غیر روایتی شعبوں جیسے خواتین فٹبال اور فٹسال میں نئے مواقع پیدا کرے گا۔
پاکستان اور بحرین کے درمیان فٹبال تعاون
کوئی تبصرہ نہیں ہے۔
