طلبہ ہمارے نظام کا بنیادی حصہ ہیں، ان کے مستقبل پر کوئی سمجھوتہ نہیں ہوگا: پی ایم اینڈ ڈی سی
پاکستان میڈیکل اینڈ ڈینٹل کونسل نے واضح کیا ہے کہ طلبہ کے تعلیمی مستقبل کا ہر صورت تحفظ کیا جائے گا اور کسی بھی فیصلے میں ان کے حقوق، میرٹ یا مواقع پر سمجھوتہ نہیں کیا جائے گا۔ قومی اسمبلی کی قائمہ کمیٹی برائے نیشنل ہیلتھ سروسز کے حالیہ اجلاس میں اٹھائے گئے نکات کا سنجیدگی سے نوٹس لیتے ہوئے کونسل نے کہا کہ وہ طلبہ، والدین اور تمام اسٹیک ہولڈرز کے خدشات کو پوری طرح سمجھتی ہے اور عملی و پائیدار حل پر کام کر رہی ہے۔
پی ایم اینڈ ڈی سی نے مؤقف اختیار کیا کہ میڈیکل اور ڈینٹل امتحانات کے معیار کو ہر سال یکساں، شفاف اور منصفانہ رکھا جائے گا۔ کونسل کے مطابق ڈیجیٹلائزیشن اور اسٹینڈرڈائزیشن کو مزید مضبوط بنایا جا رہا ہے تاکہ ہر طالبعلم کو برابری کی بنیاد پر میرٹ کے مطابق مواقع مل سکیں۔
خالی نشستوں کے مسئلے پر بات کرتے ہوئے کونسل نے بتایا کہ یونیورسٹیوں اور لاء ڈویژن کے ساتھ مل کر ایک قانونی اور شفاف منصوبہ تیار کیا جا رہا ہے جس کا مقصد نشستوں کے ضیاع کو روکنا اور اہل امیدواروں کی بروقت داخلہ پالیسیاں یقینی بنانا ہے۔
کونسل نے یہ بھی کہا کہ کیمبرج سسٹم اور مقامی تعلیمی بورڈز کے طلبہ کے درمیان برابری اور شفافیت کو یقینی بنانے کے لیے آئی بی سی سی کے ساتھ قریبی رابطہ برقرار رکھا جا رہا ہے۔ پی ایم اینڈ ڈی سی نے اس بات پر زور دیا کہ غیر ملکی نظامِ تعلیم سے پڑھنے والے تمام طلبہ کو منصفانہ گریڈ کنورژن اور مکمل تعلیمی سہولت فراہم کرنا اس کی ذمہ داری ہے۔
پی ایم اینڈ ڈی سی نے کہا کہ ہر طالبعلم کو نظام کا اہم اور بنیادی جز سمجھا جاتا ہے اور کونسل ان کے تعلیمی مفادات کے تحفظ کے لیے ہر فورم پر مکمل تعاون جاری رکھے گی۔ کونسل کا کہنا ہے کہ اس کے تمام فیصلے میرٹ، شفافیت اور قومی معیارات کے مطابق کیے جاتے ہیں۔
ایک پیشہ ور، شفاف اور طلبہ دوست ریگولیٹر کے طور پر پی ایم اینڈ ڈی سی نے اپنے عزم کا اعادہ کیا کہ وہ پاکستان کے میڈیکل اور ڈینٹل تعلیمی نظام کو مزید مضبوط بنائے گی تاکہ یہ عالمی معیار کے مطابق مستحکم اور قابلِ اعتماد رہے۔ کونسل نے طلبہ کو یقین دلایا کہ انہیں ہر ممکن مدد فراہم کی جائے گی اور ان کے مستقبل پر کسی قسم کا سمجھوتہ نہیں ہوگا۔
Read in English: PM&DC Vows to Protect Students’ Future, Ensures Merit-Based and Transparent Reforms in Medical Education
