پروفیسر ڈاکٹر ضیاء القیوم نے ہائر ایجوکیشن کمیشن کے ایگزیکٹو ڈائریکٹر کا چارج سنبھال لیا ہے، یہ تعیناتی اسلام آباد ہائی کورٹ کے حکم کے تحت کی گئی جس کے نتیجے میں ایچ ای سی کے بعض سابقہ جاری کردہ احکامات معطل کر دیے گئے ہیں، اور اس تقرری کو ہائی کورٹ میں زیرِ سماعت سول نظرثانی نمبر 259 کے حتمی فیصلے سے مشروط قرار دیا گیا ہے۔
ایچ ای سی کی جانب سے جاری آفس آرڈر میں بتایا گیا ہے کہ اسلام آباد ہائی کورٹ کے فیصلے ‘‘ضیاء القیوم بمقابلہ ایچ ای سی اور ایک اور’’ کی روشنی میں یہ اقدام اٹھایا گیا ہے۔ آفس آرڈر میں واضح کیا گیا ہے کہ مذکورہ عدالتی حکم کے تحت ایچ ای سی کے پہلے سے جاری کردہ احکامات موثر نہیں رہیں گے جب تک متعلقہ عدالتی کاروائی کا حتمی فیصلہ سامنے نہ آئے۔
اطلاع میں مزید کہا گیا ہے کہ پروفیسر ڈاکٹر ضیاء القیوم کی اس عبوری تقرری کو عدالت میں زیرِ سماعت معاملے کے حتمی فیصلے تک برقرار رکھا جائے گا، یعنی حتمی فیصلہ آنے کے بعد ہی تعیناتی کی قانونی حیثیت طے ہوگی۔ اس حوالے سے ایچ ای سی نے عدالتی عمل کی پاسداری اور متعلقہ ضوابط کے تحت کارروائی جاری رکھنے پر زور دیا ہے۔
پروفیسر ڈاکٹر ضیاء القیوم طویل تجربہ رکھتے ہیں اور قبل ازیں اعلیٰ تعلیمی شعبے میں مختلف اہم عہدوں پر خدمات سر انجام دے چکے ہیں۔ ایچ ای سی کے اعلامیہ میں ان کے تجربے اور خدمات کا تذکرہ بھی کیا گیا ہے، جبکہ ادارہ عدالتی فیصلے کے بعد آئندہ حکمتِ عملی سے متعلق اپنی پالیسی واضح کرے گا۔
