این سی سی آئی اے نے راولپنڈی میں واقع اے پی ایس اینڈ سی ایف ڈبلیو او میں ڈیجیٹل دور کے چیلنجز کے پیش نظر ایک وسیع آگاہی سیمینار کا انعقاد کیا، جس میں چار ہزار طلبہ کو سائبر سکیورٹی سے متعلق تفصیلی بریفنگ دی گئی۔پروگرام میں شرکاء کو انٹرنیٹ کے محفوظ استعمال کی ہدایات دی گئیں اور سوشل میڈیا پر پرائیویسی سیٹنگز کو مضبوط رکھنے، نجی معلومات شیئر کرنے سے پہلے احتیاط برتنے اور نامعلوم افراد سے محتاط رہنے کی تاکید کی گئی۔ سائبر سکیورٹی کے بنیادی اصول نوجوانوں کے روزمرہ رویوں میں شامل کرنے پر زور دیا گیا۔تقریب میں بینکنگ فراڈ، جعلی لنکس اور مالیاتی لین دین سے جڑے فریب خصوصاً ایزی پیسہ اور جاز کیش جیسی موبائل والٹس سے متعلق اسکیموں کے خطرات پر روشنی ڈالی گئی اور طلبہ کو مشورہ دیا گیا کہ مشتبہ روابط پر کلک نہ کریں اور اپنی مالی معلومات کبھی شیئر نہ کریں۔ڈیٹا کی حفاظت کے سلسلے میں مضبوط پاس ورڈز بنانے، انہیں باقاعدگی سے تبدیل کرنے اور دو مرحلائی توثیق کو فعال رکھنے کی ہدایات دی گئیں تاکہ آن لائن اکاؤنٹس غیر مجاز رسائی سے محفوظ رہ سکیں۔ سائبر سکیورٹی کے عملی اقدامات اور احتیاطی تدابیر واضح طور پر بیان کی گئیں۔آن لائن ہراسگی اور بلیک میلنگ جیسے جرائم کے خلاف قانونی کارروائی کے طریقہ کار کے بارے میں بھی معلومات فراہم کی گئیں تاکہ متاثرین بروقت متعلقہ اداروں سے رابطہ کر کے قانونی راستہ اختیار کر سکیں اور اپنا تحفظ یقینی بنا سکیں۔پرنسپل بریگیڈیئر ڈاکٹر ملک نے اس بریفنگ کو دورِ حاضر کی اہم ضرورت قرار دیا اور این سی سی آئی اے کی پیشہ ورانہ مہارت اور قیادت کو سراہا، جبکہ شرکاء نے پروگرام کو معلوماتی اور مفید قرار دیا۔اس مہم کا مقصد نوجوانوں میں سائبر سکیورٹی کے شعور کو فروغ دینا اور قومی سطح پر ڈیجیٹل حفاظت کے حوالے سے شعور اجاگر کرنا ہے، اور عوام سے اپیل کی گئی کہ وہ اپنی آن لائن سرگرمیوں میں احتیاط برت کر اپنا ڈیجیٹل مستقبل محفوظ بنائیں۔
نوجوانوں کے لیے سائبر سکیورٹی آگاہی مہم
کوئی تبصرہ نہیں ہے۔
