نیویارک میں پاکستانی قونصلیٹ اور اقوامِ متحدہ میں پاکستانی مشن کی جانب سے "یومِ استحصال کشمیر” کی تقریب منعقد کی گئی جس میں بھارت کے زیرِ قبضہ جموں و کشمیر کے عوام کے ساتھ پاکستان کی مستقل حمایت کا اعادہ کیا گیا۔ اس تقریب کا مقصد بھارتی مظالم اور مقبوضہ علاقہ میں انسانی حقوق کی خلاف ورزیوں کو اجاگر کرنا تھا۔
تقریب میں بڑی تعداد میں پاکستانی نژاد امریکی، کشمیری کمیونٹی، سول سوسائٹی، تعلیمی ماہرین، میڈیا نمائندگان اور سفارتی حلقے شریک ہوئے۔ اس موقع پر قونصل جنرل عامر احمد اتوزئی نے کشمیری عوام کی استقامت اور قربانیوں کو خراج تحسین پیش کرتے ہوئے کہا کہ 5 اگست 2019 کو بھارت کی غیر قانونی اور یکطرفہ کارروائیوں کا مقصد جموں و کشمیر کے آبادیاتی اور سیاسی ڈھانچے کو تبدیل کرنا تھا، جو بین الاقوامی قوانین اور اقوامِ متحدہ کے متعدد قراردادوں کی صریح خلاف ورزی ہے۔
انہوں نے اس بات پر زور دیا کہ جموں و کشمیر کا تنازع عالمی سطح پر تسلیم شدہ مسئلہ ہے جس کے حل کے لیے اقوامِ متحدہ کا چارٹر رہنمائی فراہم کرتا ہے۔ انہوں نے عالمی برادری سے مطالبہ کیا کہ وہ بھارت کو انسانی حقوق کی سنگین خلاف ورزیوں پر جوابدہ ٹھہرائے اور کشمیری عوام کو ان کا حقِ خودارادیت دلوانے کے لیے عملی اقدامات کرے۔
تقریب میں صدرِ پاکستان، وزیراعظم اور نائب وزیراعظم/وزیر خارجہ کے خصوصی پیغامات بھی پیش کیے گئے جن میں کشمیر کاز پر پاکستان کے اصولی مؤقف اور سفارتی، سیاسی اور اخلاقی حمایت کے تسلسل کی یقین دہانی کرائی گئی۔
اقوامِ متحدہ میں پاکستان کے مستقل مندوب، سفیر عاصم افتخار احمد نے کلیدی خطاب میں بھارتی حکومت کی پالیسیوں کو ظالمانہ طرزعمل رکھنے والے دیگر ادوار سے تشبیہ دیتے ہوئے کہا کہ بھارت مقبوضہ وادی میں بنیادی حقوق سلب کر کے آبادیاتی تبدیلیاں لا رہا ہے۔ انہوں نے بتایا کہ پاکستان مسئلہ کشمیر کے پرامن حل کے لیے بین الاقوامی سطح پر سفارتی کوششیں جاری رکھے ہوئے ہے اور اقوامِ متحدہ میں یہ مسئلہ اجاگر کرتا رہے گا۔
دیگر مقررین میں او آئی سی کے مستقل مبصر سفیر حمید اوپلویرو، ڈاکٹر غلام نبی فائی (ورلڈ کشمیر اویئرنیس فورم)، سینئر اکادمی و صحافی ڈاکٹر عبد الحمید سیام اور کشمیری کمیونٹی کے معروف رہنما ڈاکٹر آصف الرحمان شامل تھے۔ مقررین نے مقبوضہ کشمیر میں بھارتی مظالم کی شدید مذمت کی اور کشمیری عوام کے ساتھ اپنی بھرپور یکجہتی کا اظہار کیا۔
تقریب کا اختتام اس عزم کے اظہار پر ہوا کہ پاکستان ہر پلیٹ فارم پر کشمیریوں کے حق کے لیے آواز بلند کرتا رہے گا اور اقوامِ متحدہ کی قراردادوں کے مطابق کشمیریوں کی خواہشات کی تکمیل تک ان کے شانہ بشانہ کھڑا رہے گا۔
