وفاقی وزیر صحت مصطفیٰ کمال نے ورلڈ بینک کے اعلیٰ سطحی وفد کے ساتھ ملاقات میں پاکستان کے نظام صحت کو مضبوط بنانے کے لئے جاری اقدامات اور درپیش چیلنجز پر مفصل تبادلہ خیال کیا۔ ملاقات میں نیشنل ہیلتھ سپورٹ پروگرام کے مؤثر نفاذ اور اس کے نتائج کو بہتر بنانے پر زور دیا گیا۔وفاقی وزیر نے ورلڈ بینک کی درخواست پر متعلقہ حکام کو ہدایت کی کہ فوراً انٹر منسٹریل ہیلتھ اور پاپولیشن کونسل کو دوبارہ فعال کیا جائے تاکہ پالیسی سطح پر مربوط فیصلے جلد سامنے آئیں۔ انہوں نے کہا کہ اسی ہفتے بین الصوبائی وزارتی اجلاس بلایا جائے تاکہ صوبائی سطح کے امور پر مربوط مشاورت ممکن بنائی جا سکے۔نظام صحت کے دائرہ کار کو تیزی سے وسیع کرنے کے عزم کا اعادہ کرتے ہوئے وزیر نے یونیورسل ہیلتھ کوریج سے متعلق ایک اجلاس اسی ہفتے طلب کرنے کی ہدایت کی تاکہ صحت کی سہولیات کی رسائی میں یکسانیت اور بہتری لائی جا سکے۔ انہوں نے کہا کہ ملک بھر میں طبی سہولیات کی فراہمی کو جلد وسیع کیا جانا ضروری ہے۔نیشنل ہیلتھ سپورٹ پروگرام کی مدت میں ایک سال کی توسیع کے مطالبے کو وفاقی وزیر نے سنجیدگی سے اٹھایا تاکہ پروگرام کی تکمیل اور پالیسی اہداف کو بہتر انداز میں حاصل کیا جا سکے۔ اس ضمن میں وزارت اور ورلڈ بینک کے مابین قریبی رابطہ اور معلومات کے تبادلے کو فروغ دینے پر اتفاق ہوا، تاکہ نظام صحت میں اصلاحات کو مستحکم اور مؤثر بنایا جا سکے۔گلوبل فنانسنگ فیسیلٹی کے تحت خواتین، بچوں اور نوعمر افراد کی صحت و غذائیت کے حوالے سے ایک فوکل پرسن نامزد کرنے کی تجویز دی گئی جسے وفاقی وزیر نے منظور کیا۔ اس اقدام کا مقصد مخصوص صحت پروگراموں پر توجہ مرکوز کر کے نتائج کو بہتر بنانا بتایا گیا۔ورلڈ بینک کے وفد نے آئندہ دو سے تین ماہ میں ایک ڈونر کانفرنس کے انعقاد کی تجویز پیش کی جس کا مقصد وفاقی وزیر کے اگلے دو سے تین سالہ وژن کو اجاگر کرنا اور پاکستان کے شعبہ صحت میں شراکت داری و سرمایہ کاری کے نئے مواقع تلاش کرنا ہے۔ وفاقی وزیر نے اس تجویز کا پرجوش خیر مقدم کیا اور وزارت کی طرف سے بھرپور تعاون کی یقین دہانی کرائی۔ملاقات کے دوران پاکستان کے نظام صحت کی مضبوطی کے لیے باہمی تعاون کو مزید مؤثر اور مضبوط بنانے پر زور دیا گیا۔ دونوں فریقوں نے آئندہ رابطوں اور تکنیکی معاونت کے ذریعے صحت کے شعبے میں اصلاحات کو تیز کرنے کا عندیہ دیا تاکہ عوامی سطح پر خدمات کی رسائی اور معیار میں فوری بہتری لائی جا سکے۔
ورلڈ بینک سے ملاقات میں صحت کے نظام کی مضبوطی
کوئی تبصرہ نہیں ہے۔
