بیرون ملک گھریلو ملازمت کیلئے خواتین کی کم از کم عمر 35 سال سے کم کر کے 25 سال کر دی گئی
اسلام آباد:
حکومتِ پاکستان نے امیگریشن رولز 1979 میں ترمیم کرتے ہوئے بیرون ملک گھریلو ملازمت، آیا اور گورنس کے طور پر کام کرنے والی خواتین کی کم از کم عمر کی حد 35 سال سے کم کر کے 25 سال مقرر کر دی ہے۔
اس سے قبل ان شعبوں میں کام کرنے والی خواتین کی کم از کم عمر 35 سال تھی، جبکہ وفاقی حکومت کی اجازت سے پانچ سال کی نرمی (یعنی 30 سال تک) دی جا سکتی تھی۔ تاہم نئی ترمیم کے تحت اب 25 سال یا اس سے زائد عمر کی خواتین کو بیرون ملک گھریلو ملازمت کے لیے اہل قرار دیا گیا ہے۔
ترمیمی قانون کے مطابق وفاقی حکومت کو اختیار حاصل ہو گا کہ وہ وقتاً فوقتاً مختلف شعبوں میں کام کرنے والی خواتین کے لیے عمر کی حد مقرر کرے۔ مزید یہ کہ کوئی بھی اوورسیز ایمپلائمنٹ پروموٹر (OEP) حکومت کی مقرر کردہ حد سے کم عمر خواتین کی ملازمت کی درخواست قبول یا پراسیس نہیں کر سکے گا۔
بیورو آف امیگریشن اینڈ اوورسیز ایمپلائمنٹ کے مطابق اس فیصلے سے نسبتاً کم عمر اور قابلِ ملازمت خواتین کو محفوظ اور ضابطے کے مطابق بیرون ملک روزگار کے مواقع حاصل کرنے میں آسانی ہو گی۔ حکام کا کہنا ہے کہ یہ پالیسی خواتین کی بین الاقوامی لیبر فورس میں شمولیت میں اضافہ، ترسیلاتِ زر میں بہتری اور خواتین و ان کے خاندانوں کی مالی خودمختاری کو فروغ دے گی۔
