ورلڈ ہیلتھ آرگنائزیشن پاکستان اور متحدہ عرب امارات کی معاونت سے پولیو کے خلاف حفاظتی مہم جاری ہے۔ راولپنڈی کے ترلائی علاقے کے رورل ہیلتھ سینٹر میں بچوں کو پولیو سے بچاؤ کے ٹیکے لگانے کی مہم میں یو اے ای پاکستان اسسٹنٹس پروگرام کے ڈائریکٹر عبداللہ خلیفہ الغافلی اور ورلڈ ہیلتھ آرگنائزیشن کے نمائندے نے طبی عملے کے ساتھ شرکت کی۔
اس موقع پر یو اے ای کی مالی معاونت کے ساتھ عالمی ادارہ صحت پاکستان کو پولیو جیسے موذی مرض سے بچوں کو محفوظ بنانے میں مدد فراہم کر رہا ہے۔ اس مہم کا مقصد ملک بھر میں لاکھوں بچوں کو معذور کن بیماری پولیو سے بچانا ہے۔ اس کوشش میں یو اے ای ایمبیسی اسلام آباد، پاکستان پولیو ایراڈیکیشن انیشی ایٹو اور وزارت قومی صحت بھی اہم کردار ادا کر رہی ہیں۔
وزارت صحت کے حکام نے مزید کہا کہ بین الاقوامی اداروں کے تعاون سے پاکستان سے پولیو کے خاتمے میں تیز رفتاری سے پیشرفت ہو رہی ہے اور ہر بچے کو پولیو ویکسین پہنچانے کے لیے تمام وسائل بروئے کار لائے جا رہے ہیں۔
