اسلام آباد، ۷ نومبر ۲۰۲۵ کو وفاقی وزیر مملکت برائے وفاقی تعلیم و پیشہ ورانہ تربیت محترمہ وجیہہ قمر نے امریکہ کی قائم مقام سفیر نیٹلی بیکر سے اپنے دفتر میں ملاقات کی۔ امریکی وفد میں اینڈریو ہالس، ہیڈی اسمتھ اور صابر شریف بھی شامل تھے۔ ملاقات میں تعلیم اور تکنیکی و پیشہ ورانہ تربیت کے شعبوں میں باہمی تعاون کو مضبوط بنانے کے ذرائع پر تفصیلی گفت گو ہوئی۔بات چیت کا محور مہارت سازی، اساتذہ کی تربیت، ڈیجیٹل تعلیم اور نوجوانوں کو بااختیار بنانے کے اقدامات تھے۔ دونوں طرف سے اس امر پر زور دیا گیا کہ تکنیکی تعلیم اور ہنر مندی کے پروگرامز کو موجودہ روزگار کے تقاضوں کے مطابق ڈھالا جائے تاکہ نوجوان تیزی سے بدلتی ہوئی عالمی معیشت کے تقاضوں کے لیے تیار ہوں۔محترمہ وجیہہ قمر نے کہا کہ امریکی تعاون نے طویل عرصے سے ملک کے تعلیمی نظام میں شمولیتی تعلیم، لڑکیوں کی تعلیم اور صلاحیت سازی کے پروگراموں کو تقویت دی ہے اور حکومت اس شراکت داری کو مزید بڑھانے کی خواہاں ہے۔ انہوں نے تکنیکی تعلیم کو قومی ترجیحات میں شامل کرنے اور تعلیم و تربیت کو بازارِ کار کے مطابق منظم کرنے پر زور دیا۔نیٹلی بیکر نے امریکی تعاون جاری رکھنے کا اعادہ کرتے ہوئے بتایا کہ پہلے سے جاری امریکی مالی معاونت سے متعدد تعلیمی پروگرام کامیاب ثابت ہوئے ہیں اور وہ تحقیق، اساتذہ کی پیشہ ورانہ ترقی اور ڈیجیٹل لرننگ کے شعبوں میں مزید شراکت داری کے امکانات تلاش کرنے میں دلچسپی رکھتی ہیں۔ ملاقات میں دونوں فریقین نے رسائی، مساوات اور معیاری تعلیم کو بڑھانے کے لیے نئے مواقع تلاش کرنے پر اتفاق کیا۔شرکا نے مشترکہ منصوبہ بندی کے ذریعے تکنیکی تعلیم کے دائرہ کار کو وسیع کرنے، مہارتوں کی فراہمی اور نوجوانوں کے روزگار کے امکانات میں اضافہ کرنے پر توجہ دینے کا عہد کیا تاکہ یہ اقدامات انسانی سرمائے کی ترقی اور سماجی و اقتصادی بہتری میں مثبت کردار ادا کریں۔
وجیہہ قمر اور امریکی سمت تعاونِ تعلیم پر اتفاق
کوئی تبصرہ نہیں ہے۔
