یونیسف کی نئی نمائندہ پیرنیلا آئرن سائیڈ نے اپنے عہدے کا چارج سنبھال لیا ہے اور اقوام متحدہ کے امور کے اسپیشل سیکریٹری نبیل منیر کو اپنی اسناد پیش کی ہیں۔ ان کا کہنا ہے کہ یونیسف پاکستانی بچوں کے حقوق کے تحفظ اور فروغ کے لیے مکمل عزم کے ساتھ کام جاری رکھے گا اور ملک بھر کے بچوں کی فلاح وبہبود کے لیے جامع حکمت عملی اپنائی جائے گی۔
وزارتِ خارجہ میں ہونے والی ملاقات میں پیرنیلا آئرن سائیڈ نے کہا کہ یونیسف پیدائش سے لے کر بلوغت تک بچوں کی پرورش، تعلیم، تحفظ اور معاونت کو یقینی بنانے کے لیے ہمہ جہت پروگرامنگ کرتا ہے۔ ان کے مطابق پاکستان میں بچوں کی اصل قوت ان کی غیر محدود صلاحیتوں میں ہے اور اس کے بھرپور استعمال سے ملک میں نمایاں اور پائیدار تبدیلی لائی جا سکتی ہے۔ انہوں نے حکومت، اقوام متحدہ، سول سوسائٹی، عوامی اور نجی شعبوں سمیت تمام شراکت داروں کے ساتھ مل کر کام کرنے کے عزم کا اعادہ کیا۔
یونیسف کی ترجیحات میں تعلیم کے معیار اور رسائی کو بہتر بنانا، ماں اور نوزائیدہ بچوں کی صحت کی سہولتوں میں اضافہ، بچوں میں غذائی قلت پر قابو پانا، صاف پانی اور حفظان صحت کی خدمات فراہم کرنا، بچوں کے تحفظ کے نظام کو مضبوط بنانا، بچوں کی پیدائش کی باقاعدہ رجسٹریشن، صنفی برابری کا فروغ اور ماحولیاتی آفات و مشکلات سے بچوں کا تحفظ شامل ہے۔
پیرنیلا آئرن سائیڈ کا تعلق کینیڈا سے ہے اور وہ گزشتہ بیس سال سے زائد عرصے سے یونیسف کے مختلف عہدوں پر خدمات سرانجام دے چکی ہیں۔ ان کے تجربات میں نیویارک میں یونیسف ہیڈکوارٹر پر ڈپٹی ڈائریکٹر، نائجیریا اور عراق میں اعلیٰ قیادت، غزہ اور مشرقی کانگو سمیت دنیا کے مختلف حصوں میں ہنگامی اور ترقیاتی پروگرام کی نگرانی شامل ہے۔
ان کا کہنا تھا کہ پاکستان کی تقریباً نصف آبادی 18 سال سے کم عمر بچوں اور دو تہائی نوجوانوں پر مشتمل ہے، جو ملک کی ترقی کے لیے غیر معمولی امکانات رکھتے ہیں۔ انہوں نے کہا کہ اگر تعلیم و صحت، غذائیت، صاف پانی، بچوں کے تحفظ اور ماحولیاتی استحکام میں سرمایہ کاری کی جائے تو یہ نوجوان اور بچے ملکی ترقی اور خوشحالی کے سفر میں اہم کردار ادا کر سکتے ہیں۔ پیرنیلا آئرن سائیڈ نے یونیسف کے مشن کی قیادت جاری رکھنے اور ہر بچے کی فلاح کے لیے پرعزم رہنے کا اعادہ کیا۔
