اقوام متحدہ ویمن اور زلمی فاؤنڈیشن کے درمیان خواتین کی بااختیاری کے لئے کھیلوں اور ہنر کی ترقی کے حوالے سے مفاہمت کی یادداشت پر دستخط کئے گئے ہیں۔ اس شراکت داری کا مقصد پاکستان میں خواتین اور لڑکیوں کو کھیل، قیادت اور معاشی مواقع کی فراہمی کے ذریعے بااختیار بنانا اور صنفی مساوات کو فروغ دینا ہے۔ دونوں ادارے اس تعاون کے ذریعے خواتین کی ترقی کے لئے قومی سطح پر کھیلوں اور ہنرمندی کے متعدد پروگرامز شروع کریں گے۔
اسلام آباد میں ہونے والی تقریب میں اقوام متحدہ ویمن پاکستان کے نمائندہ جمشید ایم کاظی نے کہا کہ ہر عورت اور لڑکی کو اپنی مکمل صلاحیت حاصل کرنے کا حق ہے، چاہے وہ تعلیمی ادارے ہوں، دفاتر، معاشرہ ہو یا کھیل کا میدان۔ انہوں نے کہا کہ زلمی فاؤنڈیشن کے ساتھ یہ شراکت نہ صرف کھیلوں کی سرگرمیوں کے بارے میں ہے بلکہ سماجی رکاوٹوں کو دور کرنے اور خواتین کے لئے قیادت اور مواقع پیدا کرنے کی کوشش ہے۔ ان کا کہنا تھا کہ کھیل نہ صرف خود اعتمادی، ٹیم ورک اور برداشت پیدا کرتے ہیں بلکہ خواتین کی آواز کو بھی مضبوط بناتے ہیں۔
زلمی فاؤنڈیشن کے چیف آپریٹنگ آفیسر مین عباس نے اس موقع پر کہا کہ کھیل معاشرے کو مزید جامع بنانے میں اہم کردار ادا کرتے ہیں، اور اس نئی شراکت کے ذریعے وہ خواتین کے لئے کرکٹ سمیت دیگر شعبوں میں بھی ترقی کے مواقع فراہم کرنا چاہتے ہیں۔ ان کا کہنا تھا کہ اس اقدام سے پاکستان میں خواتین کی بھرپور نمائندگی یقینی بنائی جائے گی۔
اس اشتراک کے تحت خواتین کی کرکٹ اور فٹبال لیگ شروع کرنے کے علاوہ نوجوان لڑکیوں کے لئے کھیلوں میں حصہ داری کے مواقع بڑھائے جائیں گے۔ اس کے علاوہ مختلف ہنر سکھانے کے پروگرام بھی متعارف کروائے جائیں گے، جن کے ذریعے خواتین کو معاشی طور پر خودمختار بننے میں مدد ملے گی۔ ہنر سازی پروگرامز میں سلائی کڑھائی، ڈیزائن اور کاروبار کی تربیت شامل ہوگی، جس سے خواتین گھریلو بنیادوں پر کامیاب کاروبار شروع کر سکیں گی۔ اقوام متحدہ ویمن نہ صرف تکنیکی رہنمائی فراہم کرے گی بلکہ خواتین کے حقوق کے بارے میں آگاہی، رہنمائی کے مواقع اور میڈیا تک رسائی کو بھی یقینی بنائے گی۔
اس شراکت داری میں قیادت اور رہنمائی بڑھانے کے لئے خواتین کو مختلف شعبہ جات کی مثالی خواتین کے ساتھ منسلک کیا جائے گا، کمیونٹی کی شراکت سے پسماندہ علاقوں کی خواتین کو بھی موقع دیا جائے گا، اور کامیاب خواتین کی کہانیوں کو اجاگر کرنے کے لئے مہمات چلائی جائیں گی۔ عوامی تقریبات، ایوارڈز اور وکالتی پروگرامز کے ذریعے ادارہ جاتی سطح پر صنفی مساوات کا پیغام عام کیا جائے گا۔
یہ تعاون عورتوں اور لڑکیوں کے لئے نئے مواقع پیدا کرنے، ان میں خود اعتمادی، قیادت اور حوصلہ پروان چڑھانے اور کھیلوں و معاشی بااختیاری کے ذریعے روایتی رکاوٹیں توڑنے کی ایک اہم پیش رفت ہے۔ اس سے پاکستان میں شمولیت، برداشت اور عزم کی فضا کو فروغ دینے میں مدد ملے گی۔
اقوام متحدہ ویمن دنیا بھر میں خواتین کے حقوق، صنفی مساوات اور ان کی بااختیاری کے فروغ کے لئے سرگرم عمل ہے۔ یہ ادارہ قوانین، ادارہ جاتی نظام اور سماجی رویوں کی بہتری کے ذریعے خواتین اور لڑکیوں کے لئے مساوی مواقع فراہم کرنے کی کوشش کرتا ہے۔
