یوسی اکتیس کے رہائشیوں نے مقامی واسا سپلائی لائنوں میں گندہ پانی آ جانے کے خلاف احتجاجی مظاہرہ کیا اور فوری طور پر واسا کے سربراہ کی معطلی کا مطالبہ کیا۔ احتجاجی ریلی میں لوگوں نے صفائی اور شفاف پانی کی فراہمی کے حق میں آواز بلند کی اور ذمہ دار افسران سے جواب طلب کیا۔مظاہرین نے نعرے لگائے جن میں واضح طور پر کہا گیا "ہم ناانصافی کے قانون کو مسترد کرتے ہیں” اور "گندہ پانی فراہم کرنے کو مسترد کرتے ہیں”۔ مقامی رہنماؤں نے کہا کہ گندا پانی نہ صرف روزمرہ کے معمولات متاثر کر رہا ہے بلکہ عوامی صحت کے لیے بھی خطرہ بن چکا ہے۔ظہیر احمد اعوان، چیئرمین شہری ایکشن کمیٹی نے کہا کہ واسا باوجود بل وصول کرنے کے، پچھلے ایک ہفتے سے پانی کی فراہمی معطل رکھے ہوئے تھا۔ جب عوام نے احتجاج کیا تو وزیر اعلیٰ کے شکایات سیل نے نوٹس لیا اور واسا نے موٹر تبدیل کر کے پانی بحال کیا، مگر پچھلے تین دن سے پانی گندہ اور آلودہ آ رہا ہے، جس سے پانی کے استعمال میں سخت مشکلات درپیش ہیں۔انھوں نے مزید کہا کہ گھریلو واٹر ٹینک صاف کروانے پر رہائشیوں کو تقریباً بیس ہزار روپے تک خرچ اٹھانا پڑا کیونکہ پانی کی مٹیالی اور بدبو دار کیفیت کے باعث ٹینک کی صفائی ناگزیر ہو گئی۔ متعدد شکایات کے باوجود واسا کی طرف سے تسلی بخش کارروائی نہ ہونے پر عوام میں شدید ناراضگی ہے۔احتجاج کے بعد مقامی رہائشیں کاؤنسلر حاجی نذیر بھٹی اور ظہیر اعوان کے ہمراہ دوپہر بارہ بجے واسا کے دفتر گئے تاکہ باقاعدہ شکایت درج کرائی جا سکے، لیکن دفتر میں واسا کے سربراہ اور متعلقہ افسران دستیاب نہیں تھے جس پر لوگوں نے سوال کیا کہ جب ذمہ دار افسران ڈیوٹی کے اوقات میں موجود نہیں ہوتے تو عوام کس سے رجوع کرے؟مقامی رہنماؤں نے وزیر اعلیٰ پنجاب سے اپیل کی کہ فوری طور پر گندے پانی کی فراہمی کو روک کر صاف پانی یقینی بنایا جائے اور ناقص کارکردگی دکھانے والے واسا کے سربراہ کے خلاف سخت کارروائی کی جائے۔ مظاہرے میں کاؤنسلر حاجی نذیر بھٹی، وحید رجب خان اور عبدالرحمٰن ماما منّہ نے بھی خطاب کیا اور عوامی مطالبات کی حمایت کی۔
یوسی اکتیس کے رہائشی گندے پانی کے خلاف احتجاج
کوئی تبصرہ نہیں ہے۔
