اسلام آباد: ادارہ اسٹریٹیجک اسٹڈیز اسلام آباد کے مرکز برائے افغانستان، مشرقِ وسطیٰ و افریقہ اور پاکستان افریقہ ادارہ برائے ترقی و تحقیق کے اشتراک سے تیونس کے یومِ آزادی کی مناسبت سے ایک پروقار تقریب کا انعقاد کیا گیا۔ تقریب کا آغاز پاکستان اور تیونس کے قومی ترانوں سے ہوا جبکہ نظامت کے فرائض ڈاکٹر آمنہ خان نے انجام دیے۔
تقریب سے خطاب کرتے ہوئے مقررین میں سفیر خالد محمود، سینیٹر مشاہد حسین سید، تیونس کی ناظم الامور دورصاف معاروفی، تیونس میں پاکستان کے سفیر جاوید احمد عمرانی، اعزازی قونصل جنرل عمار رشید اور محمد حمید شامل تھے۔
سفیر خالد محمود نے اپنے ابتدائی کلمات میں کہا کہ تیونس کی آزادی کی 70ویں سالگرہ اس کے عوام کے عزم اور استقامت کی عکاسی کرتی ہے۔ انہوں نے کہا کہ پاکستان اور تیونس کے درمیان تاریخی تعلقات موجود ہیں جو 1957 میں سفارتی روابط کے قیام کے بعد سے اقتصادی و تجارتی تعاون میں تبدیل ہو چکے ہیں۔ انہوں نے اس بات پر زور دیا کہ اگرچہ باہمی تجارت محدود ہے، تاہم ٹیکسٹائل، ادویات سازی، زراعت اور صنعت کے شعبوں میں اسے مزید بڑھانے کی وسیع گنجائش موجود ہے۔
ڈاکٹر آمنہ خان نے کہا کہ تیونس کا یومِ آزادی اس کے عوام کے عزم، حوصلے اور روشن مستقبل کی علامت ہے۔ انہوں نے بتایا کہ پاکستان کی "افریقہ سے روابط” پالیسی کے تحت گزشتہ برس سے افریقی ممالک کے قومی دن باقاعدگی سے منانے کا سلسلہ شروع کیا گیا ہے، جو پاکستان کی افریقہ کے ساتھ بڑھتی ہوئی اہمیت کو ظاہر کرتا ہے۔
سینیٹر مشاہد حسین سید نے اپنے خطاب میں کہا کہ تیونس افریقی سیاست میں اہم کردار ادا کر رہا ہے اور پاکستان ان ابتدائی ممالک میں شامل تھا جنہوں نے تیونس کی آزادی کی حمایت کی۔ انہوں نے کہا کہ دونوں ممالک کے درمیان خوشگوار تعلقات موجود ہیں اور تجارت، تعلیم اور ثقافت کے شعبوں میں تعاون بڑھانے کے وسیع مواقع ہیں۔ انہوں نے عوامی روابط اور کاروباری شراکت داری کو مزید فروغ دینے کی ضرورت پر بھی زور دیا۔
تیونس کی ناظم الامور دورصاف معاروفی نے کہا کہ پاکستان اور تیونس کے درمیان مضبوط تاریخی تعلقات ہیں، خصوصاً اقوامِ متحدہ میں پاکستان کی حمایت قابلِ ذکر ہے۔ انہوں نے ترجیحی تجارتی معاہدے کے ذریعے تجارت بڑھانے، سیاحت اور ثقافتی روابط کے فروغ اور عوامی سطح پر تعلقات مضبوط بنانے پر زور دیا۔ انہوں نے زیتون کے تیل کی پیداوار میں تیونس کی مہارت کو بھی تعاون کے ایک اہم شعبے کے طور پر اجاگر کیا۔
تیونس میں پاکستان کے سفیر جاوید احمد عمرانی نے کہا کہ دونوں ممالک کے درمیان تجارتی تعلقات میں بتدریج بہتری آ رہی ہے اور کاروباری برادریوں کے درمیان روابط میں اضافہ ہو رہا ہے۔ گزشتہ سال 17 رکنی وفد کے دورہ تیونس کے دوران متعدد مفاہمتی یادداشتوں پر دستخط کیے گئے، تاہم مزید پیش رفت کے لیے ابھی بہت کام کرنا باقی ہے۔
اعزازی قونصل جنرل عمار رشید نے کہا کہ خیبر پختونخوا خصوصاً پشاور میں تجارت، سیاحت اور ثقافتی تبادلوں کے فروغ کے لیے اقدامات جاری ہیں، جبکہ تیونس کو یورپ اور افریقہ کے لیے ایک اہم دروازہ قرار دیا۔
محمد حمید نے کہا کہ پاکستان اور تیونس کے درمیان تعلقات کو ٹیکسٹائل سمیت مختلف شعبوں میں مزید آگے بڑھانے کی ضرورت ہے۔ انہوں نے کہا کہ تجارتی معاہدے سے دونوں ممالک کے درمیان تعاون کے نئے مواقع پیدا ہوں گے جبکہ زیتون کے تیل کی ٹیکنالوجی کے تبادلے سے بھی پاکستان کو فائدہ پہنچ سکتا ہے۔
تقریب کے اختتام پر پاکستان اور تیونس کے درمیان دوطرفہ تعلقات کو مزید مضبوط بنانے کے عزم کا اعادہ کیا گیا۔
