وزیراعظم پاکستان میاں محمد شہباز شریف کے ہدایت نامے کے تحت سانحہ ترلائی کلاں کے متاثرین کے لیے امدادی پیکیج پر عملدرآمد شروع کر دیا گیا ہے۔ وزیراعظم یوتھ پروگرام کے فوکل پرسن سید ذیشان علی نقوی نے اتوار کے روز اسسٹنٹ کمشنر یاسر نذیر کے ہمراہ شہداء کے گھر گھر جا کر لواحقین میں پچاس پچاس لاکھ روپے کے چیکس تقسیم کیے، اس موقع پر فاتحہ خوانی بھی کی گئی اور لواحقین سے تعزیت کا اظہار کیا گیا۔امدادی پیکیج کے تحت حکومت نے پہلے ہی واضح کر دیا تھا کہ شہداء کے ہر اہل خانہ کو پچاس لاکھ روپے، شدید زخمیوں کو تیس لاکھ روپے اور معمولی زخمیوں کو دس لاکھ روپے امداد دی جائے گی۔ مقامی انتظامیہ کے مطابق آئندہ ہفتے کے دوران تمام شہداء کے لواحقین اور زخمیوں میں امدادی چیکس کی تقسیم مکمل کر لی جائے گی تاکہ فوری مالی امداد متاثرہ خاندانوں تک پہنچ سکے۔امدادی پیکیج کی عملی تکمیل کے سلسلے میں انتظامیہ کا کہنا ہے کہ تقسیم عمل شفاف اور مستند طریقے سے کیا جا رہا ہے تاکہ حق دار افراد کو بروقت ریلیف مل سکے۔ چیکس کی تقسیم کے دوران متاثرہ خاندانوں نے حکومتی اقدامات کو سراہا اور فوری امداد پر اظہارِ تشکر کیا۔شہداء کے لواحقین اور سانحہ ترلائی کلاں سے متاثرہ خاندانوں نے وزیراعظم میاں محمد شہباز شریف، وزیر داخلہ سید محسن نقوی اور وفاقی حکومت کا شکریہ ادا کیا ہے اور مطالبہ کیا ہے کہ زخمیوں کی مکمل طبی سہولیات اور متاثرہ خاندانوں کی بحالی کے لیے اقدامات مستقل طور پر جاری رکھے جائیں۔
ترلائی کلاں کے متاثرین کیلئے امدادی رقم کی تقسیم شروع
کوئی تبصرہ نہیں ہے۔
