سویڈن کے وزیراعظم اُولف کرسٹرسن نے اعتراف کیا ہے کہ وہ سرکاری کاموں میں اکثر جدید مصنوعی ذہانت کے ٹولز، جیسے چیٹ جی پی ٹی اور فرانس کا لی چیٹ، سے مشورہ لیتے ہیں، جس پر انہیں سیاسی اور تعلیمی حلقوں، میڈیا اور مخالف سیاسی رہنماؤں کی جانب سے شدید تنقید کا سامنا کرنا پڑ رہا ہے۔
وزیراعظم کا کہنا ہے کہ وہ مصنوعی ذہانت پر مبنی ان ایپس کا تواتر سے استعمال کرتے ہیں، البتہ حساس یا خفیہ معاملات پر ان پر ہرگز بھروسہ نہیں کرتے۔ اس کے باوجود ناقدین کا مؤقف ہے کہ ایسے پلیٹ فارمز کو حکومتی فیصلوں کے لیے استعمال کرنا خطرناک ثابت ہوسکتا ہے، کیونکہ ان میں سیاسی بصیرت اور ذمہ داری کا فقدان ہوتا ہے۔ کئی ماہرین کے مطابق یہ رویہ پالیسی سازی میں احتساب کے اصولوں کو نقصان پہنچا سکتا ہے۔
میڈیا اور تبصرہ نگاروں نے بھی خبردار کیا ہے کہ مصنوعی ذہانت پر ضرورت سے زیادہ انحصار حکومت میں سنجیدہ مسائل پیدا کرسکتا ہے۔ ایک معروف اداریے نے تو صورت حال کو "مصنوعی ذہانت کے زیراثر نفسیاتی کیفیت” قرار دیا۔ ناقدین کا کہنا ہے کہ اگر ملک کا اعلیٰ ترین فیصلہ ساز سرکاری امور میں چیٹ جی پی ٹی جیسے ٹولز سے رہنمائی لے گا تو پالیسی سازی اور ٹیکنالوجی کے استعمال کے درمیان فرق معدوم ہوتا جائے گا، جو خطرناک رجحان ثابت ہوسکتا ہے۔
