وکیل سپریم کورٹ پاکستان عدنان حیدر رندھوا نے آئینی بینچ کے سامنے مفصل دلائل میں موقف اختیار کیا کہ سپر ٹیکس آئین کے خلاف ہے اور وفاقی قانون سازی کی فہرست کے درج 47 اور 52 سے صریحاً تجاوز کرتا ہے۔ اُن کا کہنا تھا کہ وفاقی حکومت کو ٹیکس عائد کرنے کا اختیار مخصوص آئینی دائرہ کار تک محدود ہے اور موجودہ سپر ٹیکس اسی آئینی حد سے باہر قرار پاتا ہے، اس لیے اس کی وصولی آئینی لحاظ سے باطل قرار پائیگی۔وکیل نے ریٹروسپیکٹیو اطلاق کے سبب ہونے والے دوہرا نقصانات پر بھی تفصیلی روشنی ڈالی۔ اُن کے بقول وہ کمپنیاں جنہوں نے ٹیکس سال 2022 کے حسابات 31 دسمبر 2021 کو بند کر دیے تھے، یکم جولائی 2022 کو نافذ ہونے والے سپر ٹیکس کے باعث بعد ازاں اسی گذشتہ دورانیے پر ٹیکس کا سامنا کر گئیں۔ اس طرح وہ کمپنیاں جنہوں نے اپنے مالی بیانات حتمی کیے اور تمام ٹیکس واجبات ادا کیے، ان پر ماضی کے عرصے کے لیے نئی محصول نافذ کرنا ناانصافی اور ٹیکس قوانین کے بنیادی اصولوں کے منافی ہے۔وکیل نے اس امر کی طرف بھی اشارہ کیا کہ سپر ٹیکس کے اطلاق کی تشریح نے خصوصی ٹیکس سال اختیار کرنے والی کمپنیوں پر غیرمعمولی اور غیرعادلانہ بوجھ ڈال دیا ہے۔ فیڈرل بورڈ آف ریونیو کی تشریح کے مطابق سپر ٹیکس کو یکم جنوری 2021 سے لاگو سمجھا گیا جبکہ حقیقت یہ ہے کہ یہ ٹیکس سال 2022 سے متعلق تھا۔ اس غلط تشریح کے نتیجے میں خصوصی ٹیکس سال رکھنے والی کمپنیوں پر اٹھارہ ماہ کا ٹیکس عائد ہو گیا، حالانکہ انکم ٹیکس قانون کے مطابق ٹیکس سال بارہ ماہ پر محیط ہوتا ہے، اور یہ نتیجہ نہ صرف منطقی طور پر غلط ہے بلکہ انصاف کے معیار کے خلاف بھی ہے۔عدنان رندھوا نے فیڈرل بورڈ کے بھارتی ٹیکس قانون کے حوالہ دینے پر بھی تنقید کی اور کہا کہ یہ مفروضہ کہ "اگلے سال کی شرح سابقہ سال پر لاگو ہو جائے گی” بھارت کے ٹیکس قوانین میں پایا جاتا ہے، مگر پاکستان کے قانونی فریم ورک میں ایسا اصول موجود نہیں۔ انہوں نے مزید کہا کہ بھارت نے اپنی نئی ٹیکس قانون سازی میں پاکستان کے ٹیکس سال ماڈل کو اپنانے کا فیصلہ کیا ہے جو اگلے سال نافذ العمل ہوگا، اس سے یہ بات واضح ہوتی ہے کہ پاکستان کا ٹیکس نظام نظریاتی طور پر درست ہے اور فیڈرل بورڈ کی بھارتی مثال پر انحصار غیر مناسب اور گمراہ کن تھا۔سپریم کورٹ کے آئینی بینچ کے سامنے یہ اہم چیلنج کل پھر جاری رہے گا جب عدنان حیدر رندھوا اپنے دلائل کو آگے بڑھائیں گے۔ اس سماعت کا نتیجہ بڑی کمپنیوں، اہم ٹیکس دہندگان اور کاروباری برادری کے لیے دور رس اثرات رکھتا ہے اور عدالت کا فیصلہ ٹیکس انتظام اور آئینی حدود کے تعین میں سنگ میل ثابت ہو سکتا ہے۔
سپریم کورٹ میں سپر ٹیکس کی آئینی مخالفت
کوئی تبصرہ نہیں ہے۔
