سندھ پارلیمانی رپورٹرز ایسوسی ایشن کے 40 رکنی وفد نے پارلیمنٹ ہاؤس اسلام آباد کا دورہ کیا، جہاں انہیں پارلیمانی امور، میڈیا کوریج اور رپورٹنگ کے عمل کے بارے میں مفصل آگاہی دی گئی۔ ڈی جی میڈیا قومی اسمبلی اور سینیٹ کے ڈائریکٹر میڈیا سمیت دیگر اہم شخصیات نے وفد کا خیرمقدم کیا اور مکمل تعاون کی یقین دہانی کروائی۔
وفد نے پارلیمنٹ ہاؤس کے مختلف حصوں، جن میں سینیٹ ہال، سینیٹ میوزیم، گلیِ دستور اور میڈیا لابی شامل ہیں، کا تفصیلی معائنہ کیا۔ میڈیا لابی میں ظفر سلطان، اسد اللہ خان، عثمان خان اور نوید اکبر نے مہمانوں کا پرجوش استقبال کیا۔ اس دوران وفد کو دونوں ایوانوں کی کارروائی اور میڈیا کوریج کے اصولوں سے آگاہ کیا گیا۔
اس موقع پر وفد کے نمائندوں نے اس بات پر زور دیا کہ پارلیمانی رپورٹنگ سے منسلک مختلف اکائیوں میں باہمی مشاورت اور ربط ضروری ہے۔ ان کا کہنا تھا کہ اگر کسی ادارے کو کوئی مسئلہ درپیش ہو تو تمام اکائیاں متحد ہو کر اس کا حل تلاش کریں۔
سینیٹ سیکریٹریٹ کے ڈائریکٹر میڈیا اسد اللہ خان اور قومی اسمبلی کے ڈی جی میڈیا ظفر سلطان نے سندھ کے صحافیوں کے وفد کو ہر ممکن تعاون فراہم کرنے کا یقین دلایا۔ ان کا کہنا تھا کہ صحافی برادری کا یہ باہمی رابطہ اور مکالمہ پارلیمانی صحافت کے فروغ میں اہم کردار ادا کرے گا۔
