وزیرِ اعظم محمد شہباز شریف سے نیشنل ڈیزاسٹر مینجمنٹ اتھارٹی کے چیئرمین لیفٹیننٹ جنرل انعام حیدر ملک نے ملاقات کی جس میں ملک بھر میں حالیہ بارشوں اور سیلاب سے متاثرہ افراد کے لیے جاری امدادی سرگرمیوں اور آئندہ کسی بھی ہنگامی صورتحال سے نمٹنے کی تیاریوں پر تفصیلی بریفنگ دی گئی۔
ملاقات کے دوران وزیرِ اعظم کو گلگت بلتستان میں پیشگی اطلاع کے نظام کو مکمل طور پر فعال بنانے اور اس مقصد کے لیے وزارت موسمیاتی تبدیلی کے ساتھ تعاون کی پیش رفت سے بھی آگاہ کیا گیا۔ وزیر اعظم نے متعلقہ اداروں کو ہدایت کی کہ این ڈی ایم اے صوبائی حکومتوں کے ساتھ کوآرڈی نیشن کو مزید مضبوط بنائے تاکہ متاثرین کی بروقت مدد اور بحالی کو یقینی بنایا جا سکے۔
وزیر اعظم نے کمزور اور خدشات سے دوچار علاقوں کے لوگوں کو موسم کی صورت حال اور آئندہ کسی بھی ممکنہ ہنگامی صورت حال کے بارے میں فوری معلومات فراہم کرنے کی بھی ہدایت کی، تاکہ ان کی بروقت رہنمائی اور حفاظت کو یقینی بنایا جا سکے۔
