پاکستان کے سرکاری اور نجی ادارے تیزی سے جدید ڈیجیٹل نظام اپنانے کی جانب گامزن ہیں، جن میں خصوصاً وزارت خزانہ، ریلوے اور توانائی کے شعبے نے ایس اے پی کے پلیٹ فارمز سے نمایاں فائدہ حاصل کیا ہے۔ اس پیش رفت سے ملکی ادارے جدید ٹیکنالوجی کی بنیاد پر اپنی کارکردگی، کارگزاری اور استحکام کو بہتر بنا رہے ہیں۔
ایس اے پی پاکستان کے کنٹری منیجنگ ڈائریکٹر، ثاقب احمد نے ایک تقریب کے دوران کہا کہ وزیراعظم شہباز شریف کا ڈیجیٹل پاکستان کا وژن ایس اے پی کے مشن سے ہم آہنگ ہے اور ملک میں کاروباری ادارے تیزی سے اپنی استعداد بڑھانے اور جدت لانے کے لیے ایس اے پی کے جدید پلیٹ فارمز کو اختیار کر رہے ہیں۔ انہوں نے بتایا کہ حکومت کا مضبوط ڈیجیٹل ایجنڈا کاروباری اداروں کو جدید خطوط پر استوار کرنے کے لیے سازگار ماحول فراہم کر رہا ہے، جبکہ ایس اے پی پرانے طریقہ کار کو بدل کر اداروں کو پائیدار ترقی کے قابل بنا رہا ہے۔
ثاقب احمد نے یہ بھی واضح کیا کہ پاکستان کے کئی اہم سرکاری ادارے جیسے وزارت خزانہ، جو بجٹ سازی کے لیے ایس اے پی پلیٹ فارمز استعمال کرتی ہے، اکاؤنٹنٹ جنرل ریونیو (AGPR) جو پنشن ادائیگیاں اسی نظام کے تحت کرتا ہے اور پاکستان ریلوے، جو اپنے ٹکٹنگ اور شیڈولنگ سسٹم کے لیے ایس اے پی کا سہارا لیتا ہے، ان جدید حلوں سے استفادہ کر رہے ہیں۔ ٹیکسٹائل اور توانائی کا شعبہ بھی اپنی اعلیٰ کارکردگی کے لیے ایس اے پی کے سسٹمز اپنارہا ہے۔
انہوں نے مزید کہا کہ ایس اے پی کے شراکت دار جیسے سسٹمز لمیٹڈ اور ٹی ایم سی، پاکستان میں کلاؤڈ ای آر پی، مصنوعی ذہانت، مالیاتی تبدیلی، ہیومن ریسورس انوویشن اور کاروباری ڈیٹا مینجمنٹ کے شعبوں میں جدید ترین حل مہیا کر رہے ہیں۔ ان کا کہنا تھا کہ یہ اقدامات ملکی معیشت کی ترقی کے لیے نہایت اہم ہیں۔
یہ امور اسلام آباد میں ایس اے پی بزنس سوئیٹ انوویشن ڈے کے موقع پر زیربحث آئے، جہاں شرکاء نے ایپلیکیشنز، ڈیٹا اور مصنوعی ذہانت کے پاکستان کی معیشت پر اثرات کا جائزہ لیا۔ اس موقع پر ایم جی موٹرز، آرامکو (GNO) اور اورینٹ میٹیریلز جیسی کمپنیوں نے بھی بتایا کہ کس طرح ایس اے پی کے جدید نظام نے ان کی پیداوار اور مسابقتی صلاحیت میں اضافہ کیا ہے۔
