اسلام آباد میں جاری سامعہ حجاب کیس میں مرکزی ملزم حسن زاہد کی جانب سے کروڑوں روپے کی فراڈ کے سنسنی خیز انکشافات سامنے آئے ہیں۔ ملزم نے تفتیش کے دوران سامعہ حجاب کی رہائش، تعلقات اور مالی معاملات سے متعلق اہم تفصیلات سے پردہ اٹھایا ہے جس سے کیس میں کئی نئے پہلو سامنے آئے ہیں۔
ذرائع کے مطابق، حسن زاہد نے بتایا کہ سامعہ حجاب کا تعلق چکوال سے ہے اور کچھ عرصہ قبل وہ راولپنڈی کے سکستھ روڈ پر واقع ایک گرلز ہاسٹل میں رہتی تھیں۔ بعدازاں وہ اپنی والدہ اور بھائی کے ساتھ اسلام آباد کے سیکٹر ای-11 میں مختلف کرایے کے گھروں میں قیام پذیر رہیں۔
حسن زاہد نے بیان دیا کہ اس کی سامعہ حجاب سے آٹھ ماہ قبل شناسائی ہوئی تھی اور اس دوران اس نے سامعہ کے اخراجات، جیسے کہ مکان کا کرایہ، گاڑی، یوٹیلیٹی بلز اور دیگر ضروریات پوری کیں۔
تفتیش کے مطابق، حسن کے دعویٰ کے مطابق سامعہ حجاب مہنگی منشیات کی عادی تھی جس پر وہ لاکھوں روپے خرچ کرتی تھی۔ معاملات اس وقت خراب ہوئے جب حسن نے سامعہ کے فون پر کسی شخص کا پیغام دیکھا، جس سے دونوں کے درمیان جھگڑا شروع ہوا۔ بعد ازاں ان کا تنازع مالی معاملات پر شدت اختیار کر گیا، خصوصاً پانچ لاکھ روپے کی لین دین پر۔
حسن زاہد کا تعلق لاہور سے ہے اور وہ لگژری گاڑیوں کی خرید و فروخت کے کاروبار میں ملوث ہے، جبکہ اس کا بھائی بیرون ملک مقیم ہے۔ ذرائع کے مطابق، وہ گاڑیوں کی خرید و فروخت سے حاصل ہونے والی رقم اکثر سامعہ کے پاس رکھتا تھا۔
دوسری طرف سامعہ حجاب نے الزام لگایا کہ حسن زاہد ایک فراڈی ہے جو جعلی کاروبار چلاتا ہے اور کئی ماہ سے ان کے پیسوں پر گزارہ کر رہا تھا۔ سامعہ کے مطابق، حسن انہیں شادی پر مجبور کرتا رہا اور انکار کی صورت میں اس نے مبینہ طور پر انہیں مارنے کی دھمکی دی اور اغوا کی کوشش بھی کی۔
پولیس کے مطابق حسن زاہد اس وقت جسمانی ریمانڈ پر ہے اور مزید تفتیش جاری ہے۔ پولیس کا کہنا ہے کہ کیس کی مکمل تحقیات کے بعد مزید حقائق سامنے آئیں گے۔
