راولپنڈی ڈویلپمنٹ اتھارٹی نے نالہ لئی کے اطراف قائم تجاوزات کے خاتمے کے لیے ایک بڑے اور بھرپور آپریشن کا آغاز کر دیا ہے۔ اس اقدام کا مقصد غیر قانونی تعمیرات اور کوڑا کرکٹ پھینکنے جیسے اقدامات کا مکمل سدباب کرنا اور شہر کو صاف اور پائیدار ماحول فراہم کرنا ہے۔
آر ڈی اے کے ترجمان کے مطابق یہ آپریشن کمشنر راولپنڈی ڈویژن انجینئر عامر خٹک اور ڈائریکٹر جنرل آر ڈی اے کنزہ مرتضیٰ کی خصوصی ہدایات پر شروع کیا گیا ہے۔ آر ڈی اے انفورسمنٹ سکواڈ نے کٹاریاں پل، ڈھوک نجو، شیخ رشید پل اور گوالمنڈی پل سمیت مختلف مقامات پر تجاوزات کے خلاف مؤثر کارروائیاں عمل میں لائیں اور سخت اقدامات کیے۔
آپریشن کی نگرانی ڈائریکٹر لینڈ آر ڈی اے ملک غضنفر علی اعوان نے اسسٹنٹ کمشنر سٹی راولپنڈی اور دیگر متعلقہ افسران کی مدد سے کی۔ اس دوران یقین دہانی کروائی گئی کہ کسی بھی صورت میں غیر قانونی سرگرمیوں کو برداشت نہیں کیا جائے گا۔
ڈائریکٹر جنرل آر ڈی اے کنزہ مرتضیٰ کا کہنا تھا کہ نالہ لئی کے اطراف کوئی شخص غیر قانونی تعمیرات نہیں کر سکے گا اور نہ ہی کوڑا کرکٹ ڈالنے کی اجازت دی جائے گی۔ انہوں نے بتایا کہ اس کریک ڈاؤن کے پیچھے وزیراعلیٰ پنجاب مریم نواز شریف کی واضح ہدایات ہیں، جنہوں نے غیر قانونی تجاوزات، تعمیرات اور تجارتی سرگرمیوں کے خلاف زیرو ٹالرنس پالیسی اپنانے کی ہدایت کی ہے۔
ترجمان آر ڈی اے کے مطابق خلاف ورزی کرنے والوں کے خلاف ایف آئی آر بھی درج کی جائیں گی اور یہ کارروائی مکمل غیر جانب داری کے ساتھ جاری رہے گی۔ اتھارٹی نے اپنے عزم کا اعادہ کیا ہے کہ شہر میں قانون کی حکمرانی اور شہریوں کے لیے محفوظ، صاف اور پائیدار ماحول کی فراہمی ہر صورت یقینی بنائی جائے گی۔
