راولپنڈی میں دوم بین الاقوامی پریسیژن ایگریکلچر کانفرنس کا آغاز، دنیا بھر کے ماہرین پاکستان میں جدید زرعی انقلاب پر متحد
راولپنڈی: پیر مہر علی شاہ زرعی یونیورسٹی راولپنڈی (پی ایم اے ایس۔اے اے یو آر) میں دوم بین الاقوامی پریسیژن ایگریکلچر کانفرنس اور ایگریکلچرل ایکسپو 20 اکتوبر سے شروع ہو رہی ہے، جس میں کینیڈا، امریکہ، چین اور دیگر ممالک کے ممتاز زرعی ماہرین اور محققین شرکت کریں گے۔ یہ تین روزہ عالمی کانفرنس پاکستان میں جدید زرعی ٹیکنالوجی اور ڈیجیٹل کاشتکاری کے فروغ کے لیے ایک سنگ میل ثابت ہوگی۔
کانفرنس کی صدارت وائس چانسلر پروفیسر ڈاکٹر قمرالزمان کی زیرِ قیادت یونیورسٹی انتظامیہ کر رہی ہے۔ افتتاحی اجلاس کے مہمانِ خصوصی وفاقی وزیر برائے منصوبہ بندی، ترقی و خصوصی اقدامات پروفیسر احسن اقبال چوہدری ہوں گے، جبکہ سینیٹر و وزیراعظم کے سیاسی امور کے مشیر رانا ثناء اللہ خان زرعی ایکسپو کا افتتاح کریں گے۔
تین روزہ کانفرنس کے دوران آٹھ تکنیکی سیشنز، عملی مظاہرے، اور جدید زرعی مشینری کی نمائش کا اہتمام کیا گیا ہے۔ عالمی ماہرین موسمیاتی تبدیلی، خودکار کاشتکاری نظام، اور مصنوعی ذہانت کے استعمال سے متعلق جدید تحقیقی نتائج اور تجاویز پیش کریں گے۔
وائس چانسلر ڈاکٹر قمرالزمان نے کہا کہ یہ کانفرنس پاکستان میں زراعت کے لیے ایک نیا دور ثابت ہوگی۔ “ہم دنیا بھر کے تجربات کو پاکستان کے کسانوں تک پہنچانا چاہتے ہیں تاکہ وہ روایتی زراعت سے جدید پریسیژن ایگریکلچر کی طرف قدم بڑھا سکیں،‘‘ ان کا کہنا تھا۔
انہوں نے مزید کہا کہ اس کانفرنس سے نہ صرف پالیسی سازوں اور ماہرین کے درمیان رابطے مضبوط ہوں گے بلکہ یہ ملک میں جدید، خودکار اور موسمیاتی لحاظ سے پائیدار زرعی نظام کے فروغ میں بھی کلیدی کردار ادا کرے گی۔
زرعی ایکسپو میں ملکی و غیر ملکی کمپنیوں کے اسٹالز لگائے جائیں گے جن میں جدید زرعی مشینری، خودکار نظام، اور ڈیجیٹل فارمنگ کے آلات پیش کیے جائیں گے۔ اس موقع پر کسانوں اور نجی شعبے کے نمائندوں کو عالمی ماہرین کے ساتھ تبادلہ خیال کا موقع ملے گا۔
کانفرنس 22 اکتوبر کو اختتام پذیر ہوگی، جہاں شرکا ایک مشترکہ اعلامیہ جاری کریں گے جس میں پاکستان کے لیے سمارٹ ایگریکلچر، ڈیٹا مینجمنٹ، اور ٹیکنالوجی کے تبادلے کے حوالے سے سفارشات شامل ہوں گی۔
