آر آئی یو جے کا کامیاب جنرل باڈی اجلاس، فنانس اور سالانہ کارکردگی رپورٹ متفقہ طور پر منظور
اجلاس میں میڈیا ورکرز کے 77 کروڑ روپے واجبات دلوانے پر آر آئی یو جے کو زبردست خراجِ تحسین
اسلام آباد: راولپنڈی اسلام آباد یونین آف جرنلسٹس (آر آئی یو جے) کا جنرل باڈی اجلاس صدر آر آئی یو جے طارق علی ورک کی صدارت میں کامیابی سے منعقد ہوا، جس میں یونین کی ایک سالہ جدوجہد، صحافیوں کے حقوق کے تحفظ اور آزادیٔ صحافت کے لیے کی گئی عملی کوششوں پر تفصیلی بریفنگ دی گئی۔ اجلاس کے تمام مقررین نے آر آئی یو جے کی ٹیم کی شاندار کارکردگی کو سراہتے ہوئے خراجِ تحسین پیش کیا۔
اجلاس سے خطاب کرتے ہوئے صدر آر آئی یو جے طارق علی ورک نے اراکین کو آگاہ کیا کہ یونین کی مسلسل جدوجہد، قانونی جنگ اور مؤثر نمائندگی کے نتیجے میں آئی ٹی این ای (ITNE) کے ذریعے صحافیوں اور میڈیا ورکرز کو 77 کروڑ روپے سے زائد کے واجبات کی ادائیگی ممکن ہوئی، جو ایک بڑی اور تاریخی کامیابی ہے۔ انہوں نے پیکا ایکٹ کے خلاف جاری جدوجہد، آزادیٔ صحافت کے تحفظ، تھانہ نیو ٹاؤن سمیت مختلف مقامات پر صحافیوں کو درپیش مسائل اور ان کے حل کے لیے اٹھائے گئے اقدامات پر بھی تفصیلی روشنی ڈالی۔
اجلاس میں قائم مقام جنرل سیکرٹری گلزار خان نے یونین کی جامع سالانہ کارکردگی رپورٹ پیش کی، جس میں احتجاجی تحریکوں، عدالتی اور پارلیمانی سطح پر جدوجہد، صحافیوں کے معاشی حقوق، جبری برطرفیوں کے خلاف اقدامات اور فلاحی سرگرمیوں کو اجاگر کیا گیا۔ فنانس رپورٹ بشیر عثمانی نے پیش کی، جس میں یونین کے مالی امور اور شفاف انتظامی اقدامات سے شرکاء کو آگاہ کیا گیا۔
اجلاس میں پاکستان فیڈرل یونین آف جرنلسٹس (پی ایف یو جے) کے صدر افضل بٹ نے ملک میں صحافت کو درپیش چیلنجز پر تفصیلی خطاب کیا۔ اجلاس سے پی ایف یو جے کے سابق سیکرٹری جنرل ناصر زیدی، فوزیہ شاہد، پریس کلب کے صدر اظہر جتوئی، سیکرٹری نیئر علی، آر آئی یو جے کے سابق صدور انور رضا، مبارک زیب، علی رضا علوی، عابد عباسی، عامر سجاد سید، شہریار خان، سابق سیکرٹری جنرل بلال ڈار اور فنانس سیکرٹری اصغر چوہدری نے بھی خطاب کیا۔
اجلاس میں پریس کلب کے فنانس سیکرٹری وقار عباسی، سابق فنانس سیکرٹری کاشان اکمل، سینئر صحافی زمان مغل، جاوید بھاگٹ، قربان ستی، کاشف رفیق، سردار شاہد، آصف ہمدانی، ملک خضر، رشید ملک، مدثر لانگ، تنویر کھوکھر، راجہ جاوید، سحرش قریشی، احتشام الحق، شاہ محمد، نوید شیخ، عاصم جیلانی، شاہد اجمل سمیت سینکڑوں صحافیوں نے شرکت کی۔
صدر طارق علی ورک نے اجلاس کے اختتام پر آر آئی یو جے کے عہدیداران سیکرٹری آصف بشیر چوہدری، قائم مقام سیکرٹری گلزار حسین خان، فنانس سیکرٹری ندیم چوہدری، جوائنٹ سیکرٹری مجاہد نقوی، سینئر نائب صدر بشیر عثمانی، نائب صدر عمار برلاس، ممبران ایگزیکٹو باڈی علی اختر، توصیف عباسی، رانا فرحان، غفران احمد چشتی، نوابزادہ شاہ علی اسد شر، افشاں قریشی، اسماء نواز، ثوبیہ مشرف، آفتاب جہاں اور اجلاس میں شریک تمام صحافی ساتھیوں کا شکریہ ادا کیا۔
جنرل باڈی کے اراکین نے یونین کی قیادت پر مکمل اعتماد کا اظہار کرتے ہوئے متفقہ طور پر کارکردگی کو سراہا اور اس عزم کا اعادہ کیا کہ آزادیٔ صحافت، صحافیوں کے وقار اور حقوق کے تحفظ کے لیے جدوجہد بھرپور انداز میں جاری رکھی جائے گی۔ اجلاس کے اختتام پر شرکاء نے اجلاس کے کامیاب انعقاد پر اطمینان کا اظہار کیا۔
