بورڈ آف انٹرمیڈیٹ اینڈ سیکنڈری ایجوکیشن راولپنڈی نے بدھ، ۱۵ اکتوبر ۲۰۲۵ کو صبح دس بجے ایک مختصر مگر پروقار تقریب میں انٹرمیڈیٹ پارٹ اول کے نتائج کا اعلان کیا۔ اس موقع پر چیئرمین تعلیمی بورڈ محمد عدنان خان، کنٹرولر امتحانات تنویر اصغر اعوان اور سیکرٹری بورڈ امجد اقبال خٹک سمیت بورڈ کے دیگر اعلیٰ افسران موجود تھے۔نتائج کے مطابق انٹرمیڈیٹ پارٹ اول میں کُل ۶۳٬۴۹۴ امیدواران نے داخلہ فارم جمع کرائے جن میں سے ۶۲٬۰۲۰ امیدوار امتحان میں شریک ہوئے۔ ان میں سے ۲۶٬۹۵۱ امیدوار کامیاب قرار پائے جبکہ ۳۵٬۰۵۲ امیدوار ناکام رہے۔ مجموعی کامیابی شرح ۴۳٫۴۶ فیصد رہی۔ اسی دوران امتحان میں ۱٬۲۱۳ امیدوار غیر حاضر رہے اور ۲۶۱ داخلہ فارم مختلف وجوہات کی بنا پر منسوخ کیے گئے۔ امتحان میں شرکت کرنے والوں میں طلباء کی تعداد ۲۳٬۳۷۲ اور طالبات کی تعداد ۴۰٬۱۲۲ رہی، جو تعلیمی میدان میں طالبات کی بڑھتی ہوئی دلچسپی کی واضح عکاسی ہے۔چیئرمین تعلیمی بورڈ محمد عدنان خان نے کہا کہ امتحانات کا شفاف انعقاد اور بروقت نتائج بورڈ کی انتھک محنت اور دیانت داری کا مظہر ہیں۔ انہوں نے کنٹرولر امتحانات تنویر اصغر اعوان، سیکرٹری امجد اقبال خٹک اور تمام افسران و ملازمین کو اس کارِ نمایاں پر دلی مبارکباد دی اور کہا کہ بورڈ نے میرٹ اور شفافیت کے اعلیٰ معیار کو برقرار رکھا ہے۔چیئرمین نے مزید کہا کہ طلباء کی کامیابی بورڈ کی اولین ترجیح ہے اور اسی مقصد کے تحت ادارہ جدید ٹیکنالوجی، شفاف نظام اور منظم امتحانی طریقہ کار کے ذریعے تعلیمی معیار کو مزید بہتر بنانے کے لیے کوششیں جاری رکھے گا۔ انہوں نے اس عزم کا اظہار کیا کہ راولپنڈی بورڈ اپنی شاندار روایات کو برقرار رکھتے ہوئے مستقبل میں مزید بہتری اور شفافیت کے نئے راستے ہموار کرے گا۔بورڈ کے ترجمان ارسلان علی چیمہ نے بتایا کہ نتائج کے اعلان کے عمل میں تمام احتیاطی تدابیر اختیار کی گئیں اور عوام کو بروقت معلومات فراہم کی جا رہی ہیں۔ انہوں نے کہا کہ بورڈ کی نیک نامی افسران اور عملے کی اجتماعی محنت، لگن اور تعلیمی دیانت داری کا نتیجہ ہے اور آئندہ بھی یکسوئی کے ساتھ کام جاری رکھا جائے گا تاکہ انٹرمیڈیٹ پارٹ اول میں شفافیت اور معیار برقرار رہے۔
راولپنڈی بورڈ نے انٹرمیڈیٹ پارٹ اول کے نتائج جاری کیے
کوئی تبصرہ نہیں ہے۔
