پنجاب اسمبلی کی قائمہ کمیٹی برائے مقامی حکومت نے لوکل گورنمنٹ بل 2025ء منظور کر لیا ہے۔ اس بل کی منظوری کے بعد صوبے میں نئے بلدیاتی نظام کا آغاز ہوگا اور حکومت پنجاب رواں سال دسمبر میں بلدیاتی انتخابات کرانے کا ارادہ رکھتی ہے۔ اس سے صوبے میں مقامی سطح پر انتظامی ڈھانچے میں نمایاں تبدیلیاں متوقع ہیں۔
چیئرمین کمیٹی پیر اشرف رسول نے کہا کہ قائمہ کمیٹی سے منظوری کے بعد اب یہ بل پنجاب اسمبلی میں پیش کیا جائے گا، جہاں سے حتمی منظوری کے بعد اس پر عملدرآمد شروع ہو جائے گا۔ انہوں نے کہا کہ بلدیاتی نظام کو جدید خطوط پر استوار کرنے کے لیے جامع تبدیلیاں متعارف کرائی گئی ہیں۔
اس نئے بل کے تحت پنجاب میں نئی حلقہ بندیاں کی جائیں گی۔ حلقہ بندیوں کے عمل میں ضلعی انتظامیہ الیکشن کمیشن کی مدد کرے گی تاکہ انتخابات شفاف انداز میں منعقد ہو سکیں۔ یونین کونسل کے وارڈ سسٹم کو ختم کر دیا جائے گا اور ہر یونین کونسل سے اب نو ممبران منتخب ہوں گے۔ اس تبدیلی کے بعد ہر یونین کونسل کے نو منتخب اراکین کو لازم ہوگا کہ وہ ایک ماہ کے اندر کسی سیاسی جماعت میں شمولیت اختیار کریں۔
ان منتخب اراکین میں سے ہی چیئرمین اور وائس چیئرمین کا انتخاب کیا جائے گا، جبکہ نو ممبران مخصوص نشستوں کے لیے نامزدگی بھی کریں گے۔ یہ اصلاحات مقامی حکومت کے نظام کو مضبوط بنانے اور عوامی نمائندگی کو زیادہ شفاف اور مؤثر بنانے کے لیے کی جا رہی ہیں۔
