گورنمنٹ ایسوسی ایٹ کالج فار ویمن سیہال میں پروکٹوریل بورڈ کی حلف برداری
راولپنڈی، 17 ستمبر 2025 — گورنمنٹ ایسوسی ایٹ کالج فار ویمن سیہال میں آج پروکٹوریل بورڈ کی پر وقار حلف برداری تقریب منعقد ہوئی۔ اس موقع پر کالج کا پروکٹوریل بورڈ باقاعدہ طور پر تشکیل دیا گیا اور منتخب طالبات سے حلف لیا گیا۔
تقریب میں کالج کے فعال تین ہاؤسز فاطمہ الزہراء، خدیجہ الکبریٰ اور عائشہ صدیقہ کے لیے طالبات کو ذمہ داریاں سونپی گئیں۔ شرکاء کو خصوصی سیشنز کے ذریعے ان ذمہ داریوں اور فرائض سے تفصیل کے ساتھ آگاہ کیا گیا تاکہ وہ مؤثر انداز میں اپنی ذمے داریاں انجام دے سکیں۔
پرنسپل سمیرا حمید اور اساتذہ نے خطاب میں کہا کہ پروکٹوریل بورڈ اور اسٹوڈنٹ کونسل کالج کی ہم نصابی سرگرمیوں اور تقاریب میں کلیدی کردار ادا کرتی ہیں۔ انہوں نے کہا کہ ہاؤسز کا مقصد طالبات میں قائدانہ صلاحیتوں کو ابھارنا اور صحت مند مقابلوں کے ذریعے ان کی صلاحیتوں کو نکھارنا ہے۔
تقریب کے اختتام پر منتخب طالبات نے عوامی طور پر حلف اٹھایا کہ وہ ایمانداری، محنت اور نظم و ضبط کے ساتھ اپنی ذمہ داریاں پوری کریں گی۔
