صحافتی آزادی پر بڑھتے خدشات اور کونسل کی تنقید

آزادیٔ اظہار پر قدغنوں پر تشویش، سی پی این ای اسلام آباد–راولپنڈی کمیٹی کا سخت ردِعمل

اسلام آباد: کونسل آف پاکستان نیوز پیپر ایڈیٹرز (سی پی این ای) کی اسلام آباد–راولپنڈی کمیٹی نے ملک میں آزادیٔ صحافت اور حقِ اظہارِ رائے کی صورتِ حال پر گہری تشویش کا اظہار کیا ہے۔ اجلاس کی صدارت چیئرمین یحییٰ سدوزئی نے کی، جہاں شرکاء نے پیکا ایکٹ کے منفی اثرات، اظہارِ رائے پر پابندیوں اور پرنٹ میڈیا کو لاحق بڑھتے ہوئے دباؤ کی سخت مذمت کی۔

اجلاس میں اس بات پر زور دیا گیا کہ پرنٹ میڈیا ہمیشہ ذمہ دار صحافتی کردار کا حامل رہا ہے، مگر اس کے باوجود اسے ایسے ہی رویے کا سامنا ہے جیسے غیر ذمہ دار میڈیا کو ہوتا ہے۔ شرکاء نے اس طرزِ عمل کو نہ صرف نامناسب قرار دیا بلکہ اسے حکومتی بیانیے کے لیے نقصان دہ بھی قرار دیا۔ اراکین نے خبردار کیا کہ اگر موجودہ پالیسیوں کو برقرار رکھا گیا تو حکومت کو مستقبل میں ان کے نتائج کا احساس ضرور ہوگا، مگر اس وقت اصلاح کی گنجائش باقی نہیں رہے گی۔

اراکین نے کہا کہ پرنٹ میڈیا نے ہر دور میں قومی اور سفارتی محاذ پر ریاست کا بھرپور ساتھ دیا ہے اور شاذ و نادر ہی ایسا ہوتا ہے کہ کسی صحافی کی خبر ریاست کے مفاد کے خلاف جائے۔ اس کے باوجود میڈیا پر دباؤ، قدغنوں اور پیکا جیسے قوانین نے آزادیٔ اظہار کو شدید متاثر کیا ہے، حالانکہ یہی قوانین وہ لوگ اپوزیشن میں رہ کر ’’کالا قانون‘‘ قرار دیتے تھے۔

اجلاس میں اس بات پر اتفاق کیا گیا کہ صرف بیانات کافی نہیں، بلکہ سی پی این ای کو میڈیا کے حقوق کے تحفظ کے لیے مؤثر اور جامع حکمتِ عملی اپنانا ہوگی۔ شرکاء نے سیمینارز، کانفرنسز اور سرکاری فورمز پر بھرپور نمائندگی کے ذریعے پالیسی سطح پر مضبوط آواز اٹھانے کی ضرورت پر زور دیا۔

اجلاس نے اے بی سی کی بحالی کا خیرمقدم کیا اور رجسٹریشن، اے بی سی اور آئی ٹی این ای سے متعلق امور کا باقاعدگی سے جائزہ لینے کی ضرورت پر بھی زور دیا تاکہ میڈیا اداروں کو درپیش مسائل کے حل میں پیش رفت ممکن ہو سکے۔